हेटौंडाः हेटौँडामा जारी मकवानपुर जिल्ला लिग फुटबल प्रतियोगिता अन्तर्गत पदमपोखरी युथ क्लब फाइनलमा प्रवेश गरेको छ । हेटौंडा–५ स्थित पिप्ले क्याम्पा रंगशालामा बिहिबार भएको दोस्रो सेमीफाइनल खेलमा मनहरी गाउँपालिकाको हाँडीखोला एफसीलाई २–१ गोलअन्तरले हराउँदै पदमपोखरी फाइनलमा प्रवेश गरेको हो ।
यसअघि बिहिबार नै भएको पहिलो सेमीफाइनल खेलमा बागमती गाउँपालिकाको सहिद स्मृति क्लब न्यू कम्वाइन क्लबलाई टाइब्रेकरमा ६–५ गोलले हराउँदै फाइनलमा प्रवेश गरेको थियो । खेलको निर्धारित समय गोलरहित बराबरीमा भएपछि नतीजाका लागि टाइब्रेकरको सहारा लिनुपरेको थियो । टाइब्रेकरमा बराबरी भएपछि खेल सडन डेथमा पुगेको थियो ।
जिल्ला लिगको उपाधिका लागि पदमपोखरी युथ क्लब र बागमती गाउँपालिकाको सहिद स्मृति क्लबबीच फाइनल खेल शनिबार हुनेछ । लिगको उपाधि विजेता टिमले एक लाख रुपैयाँसहित शिल्ड, मेडल तथा प्रमाणपत्र प्राप्त गर्नेछन् भने उपविजेता टिमले ५० हजार रुपैयाँ सहित शिल्ड, मेडल तथा प्रमाणपत्र प्राप्त गर्नेछ ।
