हेटौंडाः हेटौंडामा ७ ए साइड खुला नकआउट फुटबल प्रतियोगिता हुने भएको छ । भुटनदेवी क्लबको आयोजनामा यही असोज ११ गतेदेखि १९ गतेसम्म प्रतियोगिता हुने भएको हो । प्रतियोगिता हेटौंडा–४, कर्रास्थित श्रमिक माध्यमिक विद्यालयको चौरमा हुनेछ ।
स्वास्थ्यका लागि खेलकुद, राष्ट्रका लागि खेलकुद भन्ने नरालाई सार्थक बनाउन आयोजना गर्न लागेको प्रतियोगितामा सहभागी हुनका लागि बुधबारसम्म टिमदर्ता गराइसक्नु पर्नेछ । खेलतालिका पनि बुधबार साँझ ८ बजेसम्म सार्वजनिक गरिने आयोजकले जनाएको छ । प्रतियोगितामा हालसम्म १९ टिमले टिमदर्ता गराएको प्रतियोगिता संयोजक सेजन खड्गीले जानकारी दिनुभएको छ । प्रतियोगितामा ३२ वटा टिमको सहभागिता रहने अनुमान रहेको संयोजक खड्गीले बताउनुभयो ।
प्रतियोगिता आयोजनाका लागि विभिन्न निकायहरुबाट सहयोग प्राप्त भइरहेको उहाँले बताउनुभयो । गत वर्ष ८ ए साइड फुटबल प्रतियोगिता आयोजना गरेको क्लबले यसवर्ष भने ७ ए साइड गर्न लागेको उहाँको भनाइ छ । प्रतियोगिताका लागि करिब २ लाख ५० हजार रुपैयाँ खर्च हुने अनुमान गरिएको उहाँले बताउनुभयो । प्रतियोगिताको उपाधि विजेता टिमले ५० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् भने उपविजेता टिमले २५ हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् । विधागततर्फ उत्कृष्ट र प्रशिक्षकका लागि पनि पुरस्कारको व्यवस्था गरिएको छ ।
