हेटौंडाः साहित्य संंगम मकवानपुर र सिस्नुपानी नेपाल मकवानपुरको संयुक्त आयोजनामा हास्यव्यङ्ग्यकार भैरव अर्यालको ८९ औं जन्मजयन्ती हेटौँडामा मनाइएको छ । शनिबार बिहान हेटौंडा–५ स्थित पुष्पलाल स्मृति पुस्तकालय परिसरमा रहेको भैरव अर्यालको अर्धकदको प्रतिमामा माल्यार्पण गरी जन्मजयन्ती मनाइएको हो ।
सिस्नुपानी नेपाल मकवानपुरका अध्यक्ष संप्रस पौडेलको सभाध्यक्षता तथा सर्जक सञ्जाल मकवानपुरका संयोजक निमेष निखिलको प्रमुख आतिथ्यतामा प्रतिमामा माल्यार्पण गरिएको हो । भैरव अर्यालको व्यक्तित्वको चर्चा गर्दै कार्यक्रममा देवराज तिवारीले गजल र चिरञ्जीवी लामिछानेले हास्यव्यङ्ग्य कविता वाचन गर्नुभएको थियो । साहित्य संगम मकवानपुरका अध्यक्ष डिबी बर्तौलाले स्वागत मन्तव्य राख्नुभएको कार्यक्रमलाई संगमका सचिव मनोज पोखरेलले सहजीकरण गर्नुभएको थियो । कार्यक्रममा आँचल साहित्य कला पुञ्जकी अध्यक्ष भावना सापकोटा, साहित्यकारहरु मुना अर्याल, देवराज खरेल लगायतको आतिथ्य रहेको थियो ।
