हेटौँडाः मकवानपुरको मनहरी गाउँपालिकामा विद्यालय छुट्टी भएर घर फर्कने क्रममा एक विद्यार्थी खोल्सा तर्ने क्रममा बगाउँदा मृत्यु भएको छ । मंगलबार साँझ ५ बजेको समयमा मनहरी–८, सिमपानी गुरुङडाँडाकी १४ वर्षीया रितिका भनिने रञ्जिता गुरुङको मृत्यु भएको मकवानपुर प्रहरीले जनाएको छ । खोल्साले बगाउँदा एकजना घाइते भएकी छिन् ।
मनहरी–८ स्थित युनाइटेड बोडिङ स्कुलकी छात्रा रन्जिता गुरुङ र महेन्द्र किरण माविमा अध्ययनरत १७ वर्षीया अर्की छात्रा घर फर्कने क्रममा मोरङगे खोल्सोले बगाएको थियो । रञ्जिता खोल्सोमा बगेर बेपत्ता भएकी थिइन् भने अर्की छात्रा सामान्य घाइते भएकी थिइन् । रञ्जिताको शव २ किलोमिटर पर भेटिएको प्रहरीले जानकारी दिएको छ । शवलाई पोष्टमार्टमका लागि हेटौँडा अस्पताल पठाइएको छ । घाइते छात्राको मनहरी अस्पतालमा उपचार भइरहेको प्रहरीले जनाएको छ ।
