हेटौँडाः बागमती प्रदेशका मुख्यमन्त्री बहादुर सिंह लामाले प्रदेश सभाबाट विश्वासको मत प्राप्त गर्नुभएको छ । मंगलबार बसेको प्रदेशसभा बैठकमा विश्वासको मत सम्बन्धी प्रसताव पेश गरेका मुख्यमन्त्री लामाको पक्षमा ६४ मत प्राप्त भएको हो । लामा बागमती प्रदेशको पाँचौं मुख्यमन्त्रीको रुपमा नियुक्त हुनुभएको हो ।
कुल ११० सदस्यीय संसदमा सरकार टिकाउन ५६ जना प्रदेश सभा सदस्यको समर्थन आवश्यक पर्दछ । जसमा लामाले ६४ जना प्रदेश सभा सदस्यको मत प्राप्त गर्नुभएको छ । उहाँलाई कांग्रेसका ३७ र एमालेका २७ जना प्रदेश सभा सदस्यले मत दिएका छन् ।
प्रदेशसभाको बैठकमा उपस्थित कुल १०३ सदस्य मध्ये उहाँको विपक्षमा ३५ मत रह्यो भने ३ मत तटस्थ रहेको थियो । बैठकमा हाम्रो नेपाली पार्टीका ६ जना प्रदेश सभा सदस्य अनुपस्थित भए भने सभामुख मत विभाजनमा सहभागि हुनुभएन । गत साउन ८ मा एमाले र कांग्रेसको गठबन्धनबाट प्रदेशको मुख्यमन्त्री नियुक्त हुनुभएका बहादुर सिंह लामाले साउन १२ मा सरकारलाई पूर्णता दिनुभएको छ । मुख्यमन्त्री लामाले १३ मन्त्रालयमा १४ मन्त्री नियुक्त गर्नुभएको छ ।
