हेटौँडाः धादिङ जिल्लाको बेनिघाट रोराङ गाउँपालिका–१०, ज्यामिरेघाटमा हायस जीपले ठक्कर दिँदा पैदलयात्रीको मृत्यु भएको छ । मृत्यु हुनेमा गोर्खा जिल्लाको गण्डकी गाउँपालिका–६ आँपचौरका १६ वर्षीय मिलन थापा मगर रहेको बागमती प्रदेश प्रहरी कार्यालय हेटौँडाले जानकारी दिएको छ ।
सोमबार बेलुका ७ बजेर १५ मिनेटको समयमा काठमाडौंबाट चितवन जाँदै गरेको बा प्र ०६–००१ ख ३०६ नम्बरको हायस जीपले ठक्कर दिँदा मगर घाईते भएका थिए । घाइते मगरलाई राजमार्ग अस्पताल मलेखुमा सामान्य उपचार पश्चात थप उपचारका लागि काठमाडौं न्युरो अस्पताल बाँसघारी लगिएकोमा उपचारको क्रममा राती १० बजेर ३० मिनेटको समयमा मृत्यु भएको प्रहरीले जानकारी दिएको छ । ठक्कर दिने हायस जीप र चालकलाई प्रहरीले नियन्त्रणमा लिएको छ ।
यस्तै दोलखा जिल्लाको बिगु गाउँपालिका–८, आलेगाउँमा पानीमा डुबेर एक बालकको मृत्यु भएको छ । मृत्यु हुनेमा कुमार थामीका २० महिनाका छोरा भिमराज थामी रहेको प्रहरीले जानकारी दिएको छ । सोमबार बालक खेल्ने क्रममा आँगन पछाडी रहेको धारामा पानी भरी राखेको प्लाष्टिकको बाल्टिनमा डुबी मृत अवस्थामा फेला परेका थिए । मुचुल्का पश्चात शव पोष्टमार्टमका लागि पशुपती चौलागाई स्मृति अस्पताल लगिएको प्रहरीले जनाएको छ ।
