हेटौँडाः मकवानपुर प्रहरीले १८ वटा गोरुसहित एक जना ट्रक चालकलाई पक्राउ गरेको छ । शुक्रबार दिउँसो १२ बजेको समयमा हेटौँडा–११, थानाभर्याङबाट उक्त गोरुसहित चालकलाई नियन्त्रणमा लिएको जिल्ला प्रहरी कार्यालय मकवानपुरले जनाएको छ ।
मनहरीबाट हेटौँडातर्फ आउँदै गरेको ना ७ ख ६६६८ नम्बरको ट्रकमा गोरु लोड गरी ल्याएको भन्ने गोप्य सुचनाको आधारमा प्रहरी टोली खटेर सुरक्षाजाँच गर्न खोज्दा ट्रक भागेर थानाभर्याङस्थित एक वर्कसपभित्र राखेको अवस्थामा फेला परेको थियो । उक्त ट्रकमा भएको १८ वटा गोरु र ट्रक चालक मनहरी–६ स्थित बसन्तपुरको ३० वर्षीय अनिल बयलकोटीसमेत निणन्त्रणमा लिएर आवश्यक कारबाहीका लागि पशु क्वारोनटाइन कार्यालय पथलैया पठाइएको जनाएको छ ।
