हेटौंडाः मकवानपुर प्रहरीले राक्सिराङ गाउँपालिकाबाट ४० किलो लागुऔषध गाँजा बरामद गरेको छ । शुक्रबार बिहान ४ बजेको समयमा वडा नम्बर ५ स्थित चैनपुर–मनहरी भित्री सडकखण्डबाट प्रहरीले उक्त लागुऔषध गाँजा बरामद गरेको जिल्ला प्रहरी कार्यालय मकवानपुरले जानकारी दिएको छ ।
इलाका प्रहरी कार्यालय मनहरीबाट खटिएको प्रहरी टोलीले राक्सिराङबाट मनहरीतर्फ आउँदै गरेको बा ६ च ८२५९ नम्बरको बोलेरो गाडी र बागमती प्रदेश ०६–००१ प ५५८९ नम्बरको मोटरसाइकललाई रोकी सुरक्षाजाँच गर्न खोज्दा गाडी नरोकी चालकहरु फरार भएका थिए । बोलेरो र मोटरसाइकललाई पछ्याउदै आउने क्रममा मनहरी–७ बाट फेरी फर्काएर सोही दिशातर्फ भाग्ने क्रममा प्रहरीले पुनः रोक्न खोज्दा प्रहरीले चलाएको मोटरसाइकललाई समेत ठक्कर दिएर बोलेरो नालामा खसेको थियो । गाडी नालामा खसेपछि दुवै सवारी चालक फरार भएका थिए । प्रहरीले बोलेरो गाडीलाई सुरक्षाजाँच गर्दा सिटमा लुकाइ छिपाई ल्याएको १० वटा पोका (४०) केजी गाँजा फेला पारी बरामद गरेको हो ।
