हेटौंडाः मकवानपुर प्रहरीले अवैध प्याजसहित दुई जनालाई पक्राउ गरेको छ । पक्राउ पर्नेमा पिकअप गाडी चालक भीमफेदी गाउँपालिका–१ का २९ वर्षीय सोमलाल घलान र प्याज साहु हेटौंडा–५ का ७१ वर्षीय कुमारबहादुर सञ्जेल रहेका छन् ।
मंगलबार साँझ ६ बजेर ३० मिनेटको समयमा हेटौंडा–१५, पिपलबोटस्थित पूर्व–पश्चिम सडकखण्डमा प्रहरी चौकी रातोमाटेबाट खटिएको प्रहरी टोलीले पथलैयाबाट हेटौंडातर्फ आउँदै गरेको ना ३ च ५१६७ नम्बरको पिकअप गाडीलाई रोकेर सुरक्षाजाँच गर्ने क्रममा प्याजको बिल नपाएपछि प्रहरीले नियन्त्रणमा लिएको हो । पिकअप गाडीबाट प्रहरीले बिल नभएको २८ बोरा (१ हजार २ सय केजी) प्याज बरामद गरेको छ ।
गाडी चालक घलान र प्याज साहु सञ्जेललाई नियन्त्रणमा लिएर बुधबार आवश्यक अनुसन्धान तथा कारबाहीको लागि बारा जिल्लास्थित राजश्व अनुसन्धान कार्यालय, पथलैयामा पठाइएको प्रहरीले जनाएको छ ।
