हेटौंडाः सधै राजमार्गमा खटिने ट्राफिक प्रहरीले शनिबार पदमार्गको सरसफाई गरेका छन् । हेटौंडा–१, भैरवडाँडास्थित धार्मिक पर्यटकीयस्थल पाथीभरा मन्दिर जाने पदमार्गको ट्राफिक प्रहरीले सरसफाई गरेका हुन् । ट्राफिक प्रहरी कार्यालय मकवानपुरका प्रमुख हरिविष्णु ढकालको नेतृत्वमा पाथिभरा मन्दिर जाने पदमार्गको सरसफाइ भएको हो ।
वर्षा मौसम लागेसँगै पदमार्गमा जमेको हिलोमाटो तथा झाडी सरसफाई गरिएको छ । पदयात्रीलाई सहजताका लागि आफ्नो टीमले सरसफाई गरेको जिल्ला ट्राफिक प्रहरी कार्यालय मकवानपुरका प्रमुख हरिविष्णु ढकालले बताउनुभयो । आफुहरु विहान दौडन जाँदा उक्त बाटो फोहोर देखेपछि शनिबार सरसफाई गरिएको प्रमुख ढकालले जानकारी दिनुभयो । उहाँले सधैजसो सामाजिक कार्य गर्ने गरिए तापनि यसपटक भने फरक प्रकृतिको कार्य गरेको बताउनुभयो । आगामी दिनहरुमा पनि यस्ता कार्यहरुलाई निरन्तरता दिने उहाँले बताउनुभयो ।
