हेटौँडाः बागमती प्रदेशकी युवा तथा खेलकुद मन्त्री रमा आले मगरले बजेटमा युवा तथा खेलकुद मन्त्रालय सरकारको प्राथमिकतामा नपरेको बताउनु भएको छ । उहाँले युवा र खेलकुद क्षेत्रको योजनाको माग, प्रथमिकता अनुसार मन्त्रालयले बजेटको सिलिङ प्राप्त गर्न नसेकको बताउनुभयो ।
प्रदेशसभाको बिहीबार बसेको बैठकमा आगामी आर्थिक वर्षको बजेट माथि उठेको प्रश्नको जवाफ दिँदै मन्त्री मगरले प्रदेश सरकारले खेलकुद क्षेत्रमा न्यूनतम बजेट दिएको बताउनुभयो । उहाँका अनुसार मन्त्रालयले गौतम वुद्ध रंगशाला, गौरिटार रंगशाला, चौतारा रंगशाला, सिन्धुली रंगशाला गरी मन्त्रालयको १५ वटा बहुवर्षे योजना रहेको छ । सो योजनामा प्राथमिकताका साथ योजना विनियोजन गर्नु स्रोतको उत्तम परिचालन हुने देखिकाले बजेट विनियोजन गरेको उहाँले बताउनुभयो ।
‘मन्त्रालयले गत सरकारले स्रोत सुनिश्चितालाई निरन्तरता दिएर बजेट विनियोजन गरेको छ । प्रदेश सरकारले अघि बढाएको बहुवर्षे योजनालाई पूर्णता दिन सक्दा खेलकुद क्षेत्रमा पूर्वाधार तर्फ महत्वपूर्ण उपलब्धी हुन सक्छ भएकाले बजेट विनियोजन गरिएको छ ।’ उहाले भन्नुभयो ।
मन्त्रालयले महत्वपूर्ण पाटो युवा तथा खेलकुद परिषदका १३ जिल्लामा संरचना परिचालन गरी सिप वर्षलाई प्रभावकारी बनाउने र सिप सिकाएर युवाहरुलाई स्वरोजगार बनाउने योजनामा काम भइरहेको उहाँको भनाई छ ।
