हेटौँडाः नेकपा एमाले मकवानपुरको नयाँ नेतृत्व चयनका लागि ७ सय ६५ प्रतिनिधिले मतदान गरेका छन् । आइतबार दिनको ४ बजेर १५ मिनेटमा सुरु भई राती करिब १० बजे मतदान सम्पन्न भएको निर्वाचन अधिकृत पिताम्बर बास्तोलाले जानकारी दिनुभएको छ ।
निर्धारित समयभन्दा ३ घण्टा १५ मिनेट ढिलो गरी मतदान सुरु भएको थियो । निर्वाचन समितिले आइतबार दिउँसो १ बजेदेखि मतदान सुरु हुने तालिका सार्बजनिक गरे पनि दिउँसो ४ बजेर १५ मिनेटमा मतदान सुरु भएको थियो । ७ सय ७७ जना प्रतिनिधि मध्ये १२ जना अनुपस्थित रहेको निर्वाचन समितिले जनाएको छ । एमाले मकवानपुरको ५ पदाधिकारीसहित १०५ सदस्यीय जिल्ला कमिटी चयनका लागि निर्वाचन भएको हो । मतगणना भने भोलि बिहान ७ बजेदेखि हेटौँडा–४ स्थित भुवनेश्वर मन्दिरको सभाहलमा हुने बताइएको छ ।
एमाले मकवानपुरको नेतृत्वका लागि अध्यक्ष पदमा ४ जनाको उम्मेदवारी परेको छ । यस्तै उपाध्यक्ष पदमा ४ जना, सचिवमा ३ जना, उपसचिव खुल्ला तर्फ ५ र महिलातर्फ ४ जनाको उम्मेदवारी परेको छ । एमाले मकवानपुरको अध्यक्ष पदमा देवराज रिमाल, इन्द्रमान स्याङ्तान, श्रीधर पोखरेल र लालबहादुर थापाको उम्मेदवारी रहेको छ ।
उपाध्यक्षमा हिदम लामा, सुनिल मोक्तान, ध्रुब चौलागाई र भरत दुलालको उम्मेदवारी परेको छ । सचिवमा मदन कुमार दाहाल, सीता बिष्ट र राजन थापाको उम्मेदवारी रहेको छ । उपसचिव खुलातर्फ ईन्द्रप्रसाद नेपाल, कृष्णप्रसाद चौलागाई, दीपक खड्का, फुर्वा दोर्जे लामा र खेमराज मगरको उम्मेदवारी रहेको छ । उपसचिव महिलातर्फ कल्पना बलामी, जुना दाहाल, आरती पाठक र पार्वती रानाको उम्मेदवारी रहेको छ ।
