हेटौंडाः स्थानीयस्तरमा हुने गरेको आगलागी, चट्याङ, बाढी, पहिरोजस्ता विपद्का विषयमा सार्वजनिक सुनुवाइ कार्यक्रम गरिएको छ । मकवानपुरगढी गाउँपालिका वडा नम्बर–६, भालुखोलामा कार्यक्रम गरिएको हो ।
जनपत्र मिडिया प्रालि हेटौंडा–२ को आयोजना तथा संसद सहयोग परियोजना संयुक्त राष्ट्रसंघीय विकास कार्यक्रम (युएनडीपी) को सहकार्यमा सार्वजनिक सुनुवाइ भएको छ । कार्यक्रममा सहभागी स्थानीय बासिन्दाहरुले विपद्का घटनाबाट जोगाउन बागमती प्रदेशका सांसद, मन्त्री तथा स्थानीय तहका जनप्रतिनिधिहरुसँग आग्रह गरेका छन् ।
बागमती प्रदेशका आर्थिक मामिला तथा योजनामन्त्री जगन्नाथ थपलियाले विपद् व्यवस्थापन गर्नु नै प्रमुख सवाल रहेको बताउनुभयो । सार्वजनिक सुनुवाइ कार्यक्रमलाई सम्बोधन गर्दै उहाँले आगलागी, वन डढेलोजस्ता विपद्को सवालमा व्यवस्थापन नै महत्वपूर्ण रहेको बताउनु भएको हो ।
मन्त्री थपलियाले वन जोगाउन हिजो जनतामा जुन प्रकारको जतन÷चासो देखिन्थ्यो, आज त्यो नरहेको बताउनुभयो । अहिलेको अवस्थामा दैवीप्रकोपबाट जोगाउने विषयमा बेवास्ता बढेकाले चुनौती भइरहेको उहाँले बताउनुभयो । उहाँले भन्नुभयो– ‘नियन्त्रणको लागि अब सचेतना बढाउनुको विकल्प छैन । पर्या–पर्यटनलाई जोगाउनु पर्छ । यसमा जनताको चासो र चिन्ता चाहिन्छ । पहिरो नियन्त्रण सम्भव छ । यी सवालहरुमा विज्ञसँग छलफल गरेर आगामी बजेटबाट सम्बोधन गर्न प्रदेश सरकार तयार छ ।’
बागमती प्रदेशका वन तथा वातावरणमन्त्री केशवप्रसाद पोखरेलले विपद्बाट बचाउँदै जिउधनको सुरक्षा गर्ने काम जनप्रतिनिधिको रहेको बताउनु भएको छ । सार्वजनिक सुनुवाइ कार्यक्रमलाई सम्बोधन गर्दै मन्त्री पोखरेलले अहिले बजेट र योजना बनाउने बेलामा सार्वजनिक सुनुवाइ गरेर जनताको गुनासो सुन्ने उचित समय भएको बताउनुभयो ।
सार्वजनिक सुनुवाइ कार्यक्रमका सुझावलाई योजनामा समेट्न सजिलो हुने मन्त्री पोखरेलको भनाइ छ । ‘जनताको जिउधनको सुरक्षा हामी जनप्रतिनिधिहरुको कर्तव्य हो’, मन्त्री पोखरेलले भन्नुभयो– ‘आगामी योजनामा जनगुनासाहरुलाई समेट्न कोशिस गरिनेछ ।’ आगालागी नियन्त्रणको लागि पूर्वतयारी आवश्यक भएको आभाष गरेको मन्त्री पोखरेलले बताउनुभयो ।
प्रदेशको कुल भूभागको ५३ प्रतिशत जमिन वनले ढाकेको बताउँदै उहाँले भन्नुभयो– ‘वनलाई आर्यआर्जनसँग जोड्न र वनको काठ प्रयोग गर्न प्रदेश सरकारले यसअघि (चैत्र २० गते) नै स्वदेशी काठमात्रै प्रयोग गर्ने निर्णय गरिसकेको छ । वनमा डढेलो लाग्नै नदिन र वनलाई जनजीविकासँग जोड्न प्रदेश सरकारलाई दबाब पुगेको छ । स्थानीय समूह, स्थानीय सरकार, प्रदेश सरकार र संघीय सरकारको समन्वयमा यस्ता विपद् रोक्नका लागि सहकार्य गर्नुपर्छ ।’
बागमती प्रदेशसभाका सदस्य भारती पाठकले वन डढेलोले मानवीय क्षतिको समेत जोखिम बढेको बताउनुभएको छ । सार्वजनिक सुनुवाइ कार्यक्रममा बोल्दै उहाँले वनमा डढेलो लाग्न नदिन सचेत हुनुभन्दा लापरबाही बढी हुन थालेको बताउनुभयो ।
प्रदेशसभा सदस्य पाठकले भन्नुभयो–‘वन डढेलो आवश्यक पनि छ । तर, अहिले व्यवस्थापनको कमजोरी र सीपको अभावका कारण वन डढेलो विपद् बन्न पुगेको हो ।’ यसको बारेमा बहस हैन पूर्वतयारी आवश्यक रहेको उहाँले बताउनुभयो । वनको काठ, जडिबुटी नष्ट भएको उहाँले बताउनुभयो । अहिले वन जोगाउन जनचेतनासँगै सीप पनि चाहिएको भन्दै प्रदेशसभा सदस्य पाठकले अग्नि नियन्त्रणमा लाग्नेहरुको सुरक्षामा प्रदेश सरकारको भूमिकाबारे समितिमा सल्लाह गर्ने बताउनुभयो ।
बागमती प्रदेशसभा सदस्य लक्ष्मी श्रेष्ठले सबैले आ–आफ्नो स्थानमा विपद्बाट बच्न ध्यान दिनुपर्ने बताउनुभयो । अहिले बागमती प्रदेश र मकवानपुर जिल्लामा समेत विपद्का घटना धेरै भएकाले यसको पूर्वतयारीमा लाग्न सरकारले ध्यान दिनुपर्नेमा उहाँले जोड दिनुभयो ।
जनपत्र मिडिया प्रालिका अध्यक्ष हरि हुमागाईको अध्यक्षतामा भएको कार्यक्रममा बागमती प्रदेशसभा सदस्य विन्दु श्रेष्ठ, सकुन्तला श्रेष्ठ, बालकुमारी विश्वकर्मा, मकवानपुरगढी गाउँपालिकाका अध्यक्ष दोर्जे लामा स्याङ्तान, निवर्तमान अध्यक्ष विदुर हुमागाई, वडा नम्बर ६ का वडा अध्यक्ष कृष्णप्रसाद बजगाईले विपद्बाट हुने जोखिम नियन्त्रणका लागि सबै एक भएर लाग्नुपर्ने बताउनुभयो ।
मकवानपुरगढी गाउँपालिकाभित्र रहेको शिवम् सिमेन्ट र हेटौंडा सिमेन्ट उद्योगको खानीमा जथाभावीरुपमा उत्खनन् गरेका कारण बाढी, पहिरोका घटना बढ्दै गएको स्थानीय टीका दाहालले गुनासो गर्नुभयो । विशेषगरी मकवानपुरगढीको बुङ्दल, सोलिथुमको चुहारलगायतका क्षेत्रमा निकै चट्याङका घटना हुने गरेको सहभागीहरुको गुनासो छ । निर्माणाधीन पुल समयमा नबन्दा वर्षायाममा भेलले गाउँलाई असर गर्ने मकवानपुरगढी–५ का अर्जुन न्यौपानेले बताउनुभयो ।
