हेटौंडाः सशस्त्र प्रहरी बल (एपीएफ) नेपाल १४ नम्बर गण हेडक्वार्टर मकवानपुरको १४ औं स्थापना दिवसको अवसरमा आयोजित सप्ताहव्यापी कार्यक्रम सम्पन्न भएको छ । बुधबार उक्त गणका गणपति सशस्त्र प्रहरी उपरीक्षक ज्ञानप्रसाद भुर्तेलको सभाध्यक्ष तथा सशस्त्र प्रहरी बल नेपाल ३ नम्बर गढीमाई बाहिनीका बाहिनीपति प्रहरी नायब महानिरीक्षक गणेश ठाडा मगरको प्रमुख आतिथ्यमा कार्यक्रम भएको हो ।
कार्यक्रममा बोल्नुहुँदै बाहिनीपति मगरले एपीएफले छोटो समयमा आफ्नो पहिचान स्थापित गर्न सफल भएको बताउनुभयो । उहाँले शान्ति सुरक्षा, सीमा सुरक्षा र नागरिकको जीवन रक्षामा सशस्त्र प्रहरी अहोरात्र खटिरहेको बताउनुभयो । यस्तै, १४ नम्बर गणका गणपति भुर्तेलले राज्यबाट प्राप्त अधिकारलाई पालना गर्दै सशस्त्रले काम गरिरहेको बताउनुभयो । मकवानपुरमा अफिम खेती नष्ट, लागूऔषध बरामद, अवैध सामग्रीहरु बरामद, वृक्षरोपण र सवारी दुर्घटनामा परेकाहरुलाई उद्दार कार्यमा सशस्त्र प्रहरीले काम गरिरहेको उहाँले बताउनुभयो ।
मकवानपुरमा १ गणसहित मद्दति तथा सेवा गुल्म, कारागार कार्यालय सुरक्षा बेश भीमफेदी, विपद् व्यवस्थापन बेश कुलेखानी र सुरक्षा बेश कत्लेखोला मनहरी गरी सशस्त्र प्रहरी बल नेपालका ५ वटा युनिटबाट उक्त कार्यहरु भइरहेको उहाँले बताउनुभयो । १४ नम्बर गणको आफ्नै भवन र जग्गा नहुँदा औद्योगिक क्षेत्रस्थित कपडा उद्योगको पुरानो र जीर्ण भवनबाट सेवा प्रवाह गरिरहेको बताउनुहुँदै उहाँले बदलिँदो सुरक्षा प्रणालीमा सेवा दिन केही चुनौती भएको बताउनुभयो ।
बागमती प्रदेशको आन्तरिक मामिला तथा कानुन मन्त्रालयका सचिव पूर्णबहादुर दर्जीले सशस्त्र प्रहरीले सामाजिक स्थायित्व कायम गर्न सफल भएको बताउनुभयो । समाजमा शान्ति, सुरक्षा, विपद् व्यवस्थापन र राजस्व संकलनमा सशस्त्रको विशेष भूमिका रहेको उहाँको भनाइ छ । उहाँले १४ नम्बर गणलाई जग्गा प्राप्तिका लागि मन्त्रालयले सहयोग गर्नेसमेत बताउनुभयो ।
स्थापना दिवस केक काटेर मनाइएको छ । गत बैशाख १७ गतेदेखि सुरु भएको वार्षिकोत्सवअन्तर्गत् हेटौंडा अस्पताल सरसफाई कार्यक्रम, टेबलटेनिस, कर्मचारी र एपीएफबीच मैत्रीपूर्ण फुटबल र हाजिरीजवाफलगायतका कार्यक्रम आयोजना भएको थियो । समापन कार्यक्रममा उत्कृष्ट सबैलाई सम्मान गरिएको छ । जिम्मेवारी र कर्तव्य पालना गरी उत्कृष्ट ढङ्गबाट कार्यसम्पादन गरेको भन्दै सशस्त्र प्रहरीका नायव उपरीक्षक प्रदीपकुमार बस्नेत, वरिष्ठ नायव निरीक्षक एकबहादुर चौलागाई, नायव निरीक्षकद्वउ ऋषिराम बस्नेत र लक्ष्मण गौतम, वरिष्ठ हवल्दार प्रदीपकुमार थारु, हवल्दार प्रतावकुमार कार्की, सहायक हवल्दार उमेश लामा, सहायक जवान भोजराज कपाडी र परिचर महेशकुमार देउलालाई सम्मान गरिएको छ ।
कार्यक्रममा कैलाश गाउँपालिकाका अध्यक्ष लोकबहादुर मोक्तान, मकवानपुरगढी गाउँपालिकाका अध्यक्ष दोर्जे लामा स्याङ्तान, इन्द्रसरोवर गाउँपालिकाका अध्यक्ष देवकृष्ण पुडासैनी, मकवानपुरका प्रमुख जिल्ला अधिकारी सूर्यप्रसाद सेढाई र जिल्ला प्रहरी कार्यालय मकवानपुरका प्रमुख प्रहरी उपरीक्षक सीताराम रिजाललगायतको आतिथ्य रहेको थियो ।
