हेटौँडाः नेपाल पत्रकार महासंघ मकवानपुर शाखाले स्थापना गरेको पत्रकार पेन्सन कार्यक्रमलाई योगदानमा आधारित बनाइने भएको छ । महासंघ मकवानपुरले २० बर्ष निरन्तर पत्रकारिता गरेका ६० बर्ष उमेर पूरा भएका पत्रकारलाई मासिक ४ हजार रुपैयाँ पेन्सन वितरण गर्न सुरु गरेको छ । पत्रकार पेन्सन कार्यक्रमका लागि महासंघ मकवानपुरले २७ लाख ५० हजार रुपैयाँ अक्षयकोष स्थापना गरेको छ ।
अक्षयकोषको रकममा वृद्धि गर्ने गरी बुधबार सम्पन्न १८ औं साधारणसभाले पत्रकार पेन्सन कार्यविधिमा संशोधन गर्दै बार्षिक एक हजार रुपैयाँ योगदानमा आधारित बनाउने निर्णय गरेको हो । पेन्सन कार्यक्रमलाई योगदानमा आधारित बनाउने विषयमा महासंघकी सदस्य सम्झना कार्कीको प्रस्तावलाई साधारणसभाले सर्वसम्मत पारित गरेको हो । यस्तै यसअघि २० बर्ष निरन्तर पत्रकारिता गरेर ६० बर्ष पूरा भई पत्रकारितामा निष्क्रिय भएकालाई भन्ने व्यवस्थामा पनि सुधार गरी क्रियाशील नै रहँदा पनि पेन्सन कार्यक्रमबाट लाभान्वित हुन सक्ने बनाइएको छ ।
पत्रकार पेन्सन कार्यक्रमका संयोजक तथा निवर्तमान अध्यक्ष हरि हुमागाईले पेन्सन कोषमा पुँजी भएका कारण सक्रिय पत्रकारलाई पनि पेन्सन कार्यक्रमबाट लाभान्वित गराउने प्रस्ताव गर्नुभएको थियो । यस्तै एकल÷बिधवा महिलालाई पनि पेन्सन कार्यक्रममा समावेश गर्ने निर्णय गरिएको छ । महासंघका सदस्य सुरेश श्रेष्ठको प्रस्तावमा साधारणसभाले सर्वसम्मत एकल÷बिधवा महिलालाई पेन्सन कार्यक्रमबाट लाभको अवसर प्रदान गर्ने निर्णय गरिएको हो । अहिले मकवानपुरका एकजना पत्रकार मात्रै पेन्सन कार्यक्रमबाट लाभान्वित हुँदै आएको छ ।
