हेटौंडाः सिस्नुपानी नेपाल मकवानपुरले २ जना स्रष्टालाई सम्मान गर्ने भएको छ । संस्थाले आफ्नो स्थापना दिवसको अवसरमा सम्मान गर्न लागेको हो ।
स्वर्गीय डा. गणेशकुमार पौडेल हास्यव्यङ्ग्य स्मृति साहित्य सम्मान २०८० बाट दाङ जिल्लाका उत्तमकृष्ण मजगैयालाई सम्मान गरिने भएको छ । पौडेलको परिवारजनले स्थापना गर्नुभएको गणेशकुमार स्मृति हास्यव्यङ्ग्य सम्मानबाट मजगैयालाई २५ हजार रुपैयाँको नगद राशि र सम्मानपत्र प्रदान गरिनेछ । व्यङ्ग्यसम्बन्धीको विभिन्न विधामा कलम चलाउँदै आउनुभएका मजगैयालाई सम्मान गर्न लागिएको संस्थाका अध्यक्ष राजकुमार लामिछानेले जानकारी दिनुभएको छ ।
यस्तै, आरसी रिजाल हास्यव्यङ्ग्य सम्मान २०८० मोरङ जिल्लाका अनिल पौडेललाई प्रदान गरिने अध्यक्ष लामिछानेले बताउनुभयो । आरसी रिजालले स्थापना गर्नुभएको हास्यव्यङ्ग्य सम्मान २०८० बाट १५ हजार रुपैयाँ नगद र सम्मानपत्र व्यङ्ग्यकार पौडेललाई प्रदान गरिने उहाँले बताउनुभयोे ।
कार्यक्रममा विभिन्न प्यारोडी गायन सँगसँगै हास्यव्यङ्ग्य रचना वाचन हुनेछ । कार्यक्रममा सम्मानित व्यक्तिहरुले पनि रचना वाचन गर्नेछन् । हेटौंडा–४ स्थित रोयल पार्टी प्यालेसमा हुने कार्यक्रमको उद्घाटन सिस्नुपानीका केन्द्रीय अध्यक्ष लक्ष्मण गम्नागेले गर्नुहुनेछ ।
