हेटौंडाः आँचल साहित्य कला पुञ्ज मकवानपुरको आयोजनामा भएको वृहत् साहित्यिक साँस्कृतिक कार्यक्रमअन्तर्गत् विद्यालयस्तरीय एकल गायन प्रतियोगितामा हेटौंडा–२ स्थित बालजागृति इंग्लिस सेकेण्डरी स्कूलका अर्मोन कार्की प्रथम भएका छन् । शनिबार हेटौंडामा भएको गायन प्रतियोगितामा ६० अंक प्राप्त गर्दै कार्की प्रथम भएका हुन् ।
बालजागृतिबाटै सुलज्ञा शाह द्वितीय भएकी छिन् भने हेटौंडा–५ स्थित ज्ञानोदय बालबाटिका आवासीय विद्यालयकी अंशु लामा तृतीय भएकी छिन् । ज्ञानोदयकै आयुष उप्रेती सान्त्वना भएका छन् । प्रतियोगितामा प्रथम, द्वितीय, तृतीय र सान्त्वना हुनेले क्रमशः ८ हजार, ६ हजार, ४ हजार र २ हजार रुपैयाँसहित प्रमाणपत्र प्राप्त गरेका छन् ।
हेटौंडा उपमहानगरपालिका वडा नम्बर ४ का वडा अध्यक्ष नवीन सिग्देलले विजयीहरुलाई पुरस्कार वितरण गर्नुभएको हो । प्रतियोगितामा सहभागी हुनका लागि २० जना प्रतियोगीहरुले नाम दर्ता गराएकोमा १५ जनाको मात्र कार्यक्रममा गीत गाए । प्रतियोगिताका कृष्णगोपाल सिंह, पूर्णविक्रम अधिकारी र सुनिता बुर्लाकोटी लुईंटेलले निर्णायकको भूमिका निर्वाह गर्नुभएको थियो ।
