हेटौंडाः राष्ट्रिय प्रजातन्त्र पार्टी (राप्रपा) नेपाल मकवानपुरले रिक्त रहेको पदमा चार जनालाई मनोनित गरेको छ । आइतबार बसेको पार्टी जिल्ला कार्यसमितिको बैठकले चार रिक्त पदमा मनोनित गरेको पार्टीका सचिव भृगु कार्कीले जानकारी दिनुभयो ।
राप्रपा नेपाल मकवानपुरका अध्यक्ष गुरुप्रसाद सापकोटाले रिक्त रहेको प्रवक्ता पदमा प्रल्हाद बानियाँलाई नियुक्त गर्नुभएको छ । यस्तै, इन्दिरा पाठकलाई सहकोषाध्यक्षमा नियुक्त गर्नुभएको हो । गीता सापकोटा र भगवान बर्ताैला सदस्य पदमा मनोनित हुनुभएको सचिव कार्कीले जानकारी दिनुभयो ।
यसअघि नै ४० सदस्यीय जिल्ला पार्टी समिति गठन भएपनि उक्त पदहरु रिक्त रहेको थियो । मनोनित हुनेहरुको पद आगामी महाधिवेशनसम्म रहनेछ । राप्रपा नेपालले आगामी फागुन महिनामा अधिवेशन गर्ने तयारी थालेको छ ।
आइतबार बसेको बैठकले मकवानपुरका सबै स्थानीय तह र वडा तहमा समिति गठन गर्न आवश्यक तयारी थाल्ने निर्णय गरेको सचिव कार्कीले बताउनुभयो । यस्तै, पार्टीका पुराना सदस्यहरुलाई फेरि पार्टीमा जोड््ने गरी तयारी थाल्ने उहाँले बताउनुभयो ।
