हेटौँडाः लागुऔषध गाँजासहित तीन जनालाई मकवानपुर प्रहरीले पक्राउ गरेको छ । बिहिबार राती एकजनालाई र शुक्रबार बिहान दुईजनालाई प्रहरीले गाँजासहित पक्राउ गरेको हो ।
बिहिबार राती १० बजेर ४५ मिनेटको समयमा हेटौँडा–३, लेवटस्थित ६१ वर्षीय कुलबहादुर कुँवरको घरबाट लागुऔषध गाँजा ५ सय ग्राम बरामद भएको प्रहरीले जनाएको छ । प्रहरीले बरामद भएको गाँजासहित कुँवरलाई नियन्त्रणमा लिई मकवानपुर जिल्ला अदालतबाट ७ दिनको म्याद अनुमती लिई हिरासतमा राखेर थप अनुसन्धान कार्य गरिरहेको जानकारी दिएको छ ।
यस्तै शुक्रबार बिहान ६ बजेर ३५ मिनेटको समयमा हेटौँडा–१५, रातोमाटे प्र्रहरी चेकपोष्टबाट १२ किलो ५ सय ग्राम गाँजासहित २ महिलालाई प्रहरीले पक्राउ गरेको छ । हेटौँडाबाट काकडभिट्टातर्फ जाँदै गरेको ज १ ख ३३३७ नम्बरको यात्रुबाहक बसमा सवार मकवानपुर जिल्लाको बकैया गाउँपालिका–४, मन्थलीकी ३२ वर्षीया चमेलीमाया घलान र बकैया–१० की २५ वर्षीया रोजीना घलानको साथबाट प्रहरीले गाँजा बरामद गरेको जनाएको छ । प्रहरीले मकवानपुर जिल्ला अदालतबाट १० दिनको म्याद अनुमती लिई दुबै जनालाई हिरासतमा राखेर थप अनुसन्धान गरिरहेको जनाएको छ ।
