हेटौंडाः हिमालयन राइडर्स सोसाइटीको आयोजनामा हुने यु–१६ जिल्लास्तरीय साइक्लिङ दौड प्रतियोगिता शनिबार हुने भएको छ । दौड प्रतियोगिता ३ किलोमिटर दुरीको हुने भएको हो ।
नयाँ वर्षको अवसर पारेर आयोजना गर्न लागेको प्रतियोगिताका लागि दर्ता शुल्क प्रतिव्यक्ति २ सय रुपैयाँ तोकिएको छ । प्रतियोगितामा सहभागी प्रतियोगीहरुले हुप्रचौरबाट साइक्लिङ दौड सुरु गरेर ३ किलोमिटर दुरी पूरा गरी हुप्रचौरमै फर्केर दौड समापन गरिनेछ ।
प्रतियोगितामा सहभागी जनाउन मकवानपुर जिल्लाभित्रका प्रतियोगीहरु हुनुपर्ने जनाइएको छ । प्रतियोगितामा ११ वर्षदेखि १६ वर्ष उमेर समूहका खेलाडीहरुले सहभागिता जनाउन पाउने छन् ।
प्रतियोगिता सहभागी जनाउने प्रतियोगीहरुले आज शुक्रबारसम्म नाम दर्ता गराइसक्नुपर्ने हिमालयन राइडर्स सोसाइटीका उपाध्यक्ष राजु थापा मगरले जानकारी दिनुभएको छ । सोसाइटीले पहिलो पटक प्रतियोगिता आयोजना गरेकाले संस्थाकै खर्चबाट प्रतियोगिता गर्न लागेको उहाँले बताउनुभयो ।
प्रतियोगितामा प्रथम, द्वितीय, तृतीय हुने एक–एक जना र सान्त्वना २ जना प्रतियोगीहरुले क्रमशः ५ हजार रुपैयाँ, ३ हजार रुपैयाँ, २ हजार रुपैयाँ र १–१ हजार रुपैयाँसहित प्रमाणपत्र प्राप्त गर्नेछन् । प्रतियोगिताका लागि ३० देखि ४० हजार रुपैयाँ खर्च हुने आयोजकको अनुमान छ ।
