हेटौँडाः लागुऔषध अफिमसहित मकवानपुर प्रहरीले एकजनालाई पक्राउ गरेको छ । दुईजना फरार भएको प्रहरीले जनाएको छ ।
बिहिबार साँझ ७ बजेर ४३ मिनेटको समयमा मकवानपुरको मनहरी गाउँपालिका–७, पेन्चेबजारबाट प्रहरीले मकवानपुरको राक्सिराङ गाउँपालिका घर भई हाल मनहरी गाउँपालिका–७ बस्ने २२ वर्षीय विवेक प्रजालाई नियन्त्रणमा लिएको छ । राक्सिराङबाट पेन्चेबजारतर्फ आउँदै गरेको बा प्र ०३–००५ प ३१०३ नम्बरको मोटरसाइकल र बा प्र ०३–००३ प ९६४७ नम्बरको मोटरसाइकललाई रोकी सुरक्षाजाँच गर्दा ९ किलो ८२० ग्राम लागुऔषध अफिम बरामद भएको प्रहरीले जनाएको छ ।
फरार भएका दुईजनाको खोजी कार्य भइरहेको प्रहरीले जनाएको छ । पक्राउ परेका प्रजालाई जिल्ला अदालतबाट १० दिनको म्याद अनुमति लिई थप अनुसन्धान गरिरहेको प्रहरीले जानकारी दिएको छ ।
