हेटौंडाः मकवानपुरको कैलाश गाउँपालिकामा दोस्रो संस्करणको गाउँपालिकास्तरीय उपाध्यक्ष भलिबल कप प्रतियोगिता हुने भएको छ । आगामी चैत १५ गतेदेखि प्रतियोगिता हुने पालिकाका खेलकुद विकास समितिका संयोजक मोहन वाईबाले जानकारी दिनुभयो ।
कैलाश–३ स्थित कालिकाटारमा हुने प्रतियोगितामा पालिकाभित्रका १२ वटा वडाका टिम सहभागी हुने संयोजक वाईबाले बताउनुभयो । प्रतियोगितामा सहभागिताका लागि चैत १० गतेसम्म टिम दर्ता गर्न पालिकाभित्रका सबै वडालाई सूचना पठाएको उहाँले बताउनुभयो । प्रतियोगिताको फाइनल खेलमा चैत १७ गते हुनेछ । प्रतियोगिताको विजेता टिमले ६० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् भने उपविजेता टिमले ४० हजार रुपैयाँ प्राप्त गर्नेछन् । यस्तै सेमिफाइनलमा पराजित दुई टिमले ५–५ हजार रुपैयाँ प्राप्त गर्नेछन् ।
