हेटौंडाः हेटौंडा उपमहानगरपालिका–२ स्थित सिद्धार्थ माध्यमिक विद्यालयका प्रधानाध्यापक मोहनप्रसाद शर्माको बिदाई गरिएको छ । उमेर हदका कारण बुधबारबाट अनिवार्य अवकास हुनुभएका शर्माको विद्यालयबाट विदाई गरिएको हो ।
बुधबार विद्यालयमा कार्यक्रमको आयोजना गरी बिदाई गरिएको विद्यालयका निमित्त प्रधानाध्यापक सागर खतिवडाले जानकारी दिनुभयो । कार्यक्रममा शर्मालाई सम्मानपत्र र मायाको चिनो प्रदान गरिएको थियो । अविरजात्रा गर्दै विद्यालयबाट नगरपालिकारोड, कांग्रेसचोक हुँदै सिद्धार्थ पथमा पुर्याई शिक्षक विद्यार्थीहरुले बिदाई गरेका थिए ।
३५ वर्षअघि सिद्धार्थ माविबाटै शिक्षण पेसामा संलग्न हुनुभएका शर्मा वि.सं २०६६ साल असोजबाट प्रधानाध्यापकको रुपमा कार्यरत हुनुहुन्थ्यो । प्रधानाध्यापकको पदमा बसेर शर्माले विद्यालयको शैक्षिक तथा भौतिक विकासमा महत्वपूर्ण भूमिका निर्वाह गर्नुभएको थियो ।
बिदाई कार्यक्रममा हेटौंडा उपमहानगरपालिकाकाका प्रमुख मीनाकुमारी लामाको प्रमुख आतिथ्य रहेको थियो । कार्यक्रममा शिक्षा विकास तथा समन्वय इकाई मकवानपुरका प्रमुख दिनानाथ गौतमको पनि आतिथ्य रहेको थियो ।
