हेटौंडाः चौथो संस्करणको हेटौंडा उपमहानगरपालिकास्तरीय मेयर कप फुटबल प्रतियोगिता आगामी चैत २४ गतेदेखि हुने भएको छ । मंगलबार पत्रकार सम्मेलनको आयोजना गर्दै नगर खेलकुद विकास समितिका अध्यक्ष रवीन्द्रप्रसाद घिमिरेले प्रतियोगिताबारे जानकारी गराउनुभयो ।
चैत २४ गते उद्घाटन हुने प्रतियोगिता हेटौंडा–५ स्थित पिप्ले क्याम्पा रंगशालामा सञ्चालन हुनेछ । प्रतियोगितामा उपमहानगरभित्रका वडाबाट सिफारिस भएर आएका खेलाडी र टिमले मात्र सहभागिता जनाउन पाउने उहाँले बताउनुभयो । प्रतियोगितामा राष्ट्रिय टिममा परेका खेलाडीले भने खेल्न नपाउने उहाँले बताउनुभयो ।
प्रतियोगितामा सहभागिता जनाउन आगामी चैत १५ गतेसम्ममा टिम दर्ता गराउनुपर्नेछ । त्यसपछि खेलकुद विकास समितिको बैठक बसेर खेल तालिका बनाउने उहाँले बताउनुभयो । यसपटक एसईई परीक्षालाई मध्यनजर गरेर प्रतियोगिता चैत अन्तिममा आयोजना गर्न लागेको उहाँले बताउनुभयो ।
प्रतियोगिताको विजेता टिमले २ लाख रुपैयाँसहित शिल्ड, मेडल तथा प्रमाणपत्र प्राप्त गर्नेछन् भने उपविजेता टिमले १ लाख ५० हजार रुपैयाँ प्राप्त गर्नेछन् । यस्तै, तृतीय हुने टिमले ५० हजार रुपैयाँ पाउने जनाइएको छ । प्रतियोगिताको सर्वोत्कृष्ट खेलाडीलाई १५ हजार रुपैयाँ र अन्य विधागत उत्कृष्टहरुले ५–५ हजार रुपैयाँ प्राप्त गर्नेछन् । प्रतियोगिताका लागि हेटौंडा उपमहानगरपालिकाले १५ लाख बजेट विनियोजन गरेको अध्यक्ष घिमिरेले बताउनुभयो ।
पत्रकार सम्मेलनमा हेटौंडा–१ का वडाध्यक्ष एवम् उपमहानगरपालिकाका प्रवक्ता सविन न्यौपाने, युवा तथा खेलकुद शाखाका प्रमुख बसन्त सिटौला र खेलकुद विकास समितिका सदस्यहरुको उपस्थिति रहेको थियो ।
