हेटौँडाः स्रोत नखुलेको झण्डै ८ लाख रुपैयाँसहित एक नेपाली र ३ जना भारतीय नागरिकलाई मकवानपुर प्रहरीले पक्राउ गरेको छ । प्रहरीले आइतबार बिहान १ बजेको समयमा हेटौँडा–१५, रातोमाटे चेकपोष्टबाट ५ लाख ४८ हजार ९ सय भारतीय रुपैयाँ र २ लाख ५० हजार नेपाली रुपैयाँ बरामद गरेको जनाएको छ ।
बीरगन्जबाट चितवनतर्फ जाँदै गरेको बिआर ०१ एआर २९९१ नम्बरको भारतीय कारलाई सुरक्षाजाँच गर्ने क्रममा कारको सिटमुनी लुकाई छिपाई ल्याएको अवस्थामा प्रहरीले स्रोत नखुलेको पैसा बरामद गरेको जनाएको छ । स्रोत नखुलेको रकमसहित पक्राउ पर्नेमा कार चालक भारतको बिहार राज्य सीतामणि थाना ९ बस्ने ३० वर्षीय राकेश कुमार, गाडिमा सवार सोही स्थानका ३० वर्षीय चन्द्र बाबु, ३७ वर्षीय अशोक राय र सुनसरी जिल्लाको कोशी गाउँपालिका–४ बस्ने ३२ वर्षीय निजाम मिया रहेको प्रहरीले जनाएको छ । प्रहरीले नगद, कारसहित ४ जनालाई नियन्त्रणमा लिई अनुसन्धान कार्य भइरहेको जनाएको छ ।
