हेटौँडाः मकवानपुरको बागमती गाउँपालिका–२, राईगाउँस्थित बागमती माविको विद्यालय व्यवस्थापन समितिमा अभिभावकको प्रतिनिधि ४ जना सदस्य चयन भएका छन् । विद्यालयको नयाँ व्यवस्थापन समिति चयनका लागि शुक्रबार निर्वाचन भएको थियो ।
निर्वाचनबाट सदस्यमा बच्छु गोले खड्का (१७२ मत), सिर्जना श्रेष्ठ (१७४ मत), जीवन पहरी (१६४ मत) र अनिता बराल (१५५ मत) निर्वाचित हुनुभएको छ । सदस्यका आकांक्षी जगतबहादुर भोलन, भगवती राना र कमला राई पराजित हुनुभएको छ । सदस्यमा पराजित भोलनले १ सय ३८ मत पाउनुभयो । भोलन बागमती–२ का निवर्तमान वडाध्यक्षसमेत हुनुहुन्छ । सर्वसम्मतरुपमा नयाँ समिति चयन हुन नसकेपछि अभिभावकहरुले मतदान गरेका थिए । निर्वाचनमा ४ सय २१ मतदाता रहेकोमा ३ सय ३० मतमात्र खसेको थियो भने १५ मत बदर भएको थियो ।
अभिभावकबाट निर्वाचित ४ जना सदस्य, शिक्षक प्रतिनिधि र प्रधानाध्यापक सम्मिलित समितिले शिक्षासेवी, समाजसेवी, विद्यालयका सहयोगीमध्येबाट २ जना मनोनित गरेपछि व्यवस्थापन समितिको अध्यक्ष चयन गरिनेछ । त्यसका लागि केही दिनमै व्यवस्थापन समितिको बैठक बस्ने जनाइएको छ ।
