हेटौँडाः सामाजिक सञ्जालमा चर्चित मेन्स रुम रिलोडेड समूहले आयोजना गरेको पाँचौ संस्करणको राष्ट्रिय फुटसल प्रतियोगितामा हेटौँडा उपविजेता भएको छ । सोमबार झापाको बिर्तामोडमा सम्पन्न भएको फाइनल खेलमा ललितपुरसँग ११–५ गोलअन्तरले पराजित हुँदै हेटौँडा उपविजेता भएको हो ।
खेलको माध्यबाट देशभरका दाजुभाइलाई सङ्गठित गर्ने, भातृत्व प्रेम, र एकता गर्ने उद्देश्यले सामाजिक सञ्जालमा स्थापित समूहले हरेक वर्ष अरु क्रियाकलापसँगै फुटसल प्रतियोगिताको आयोजना गर्दै आएको हेटौँडा फुटसल टिम क्याप्टेन निरज सिंह ठकुरीले जानकारी दिनुभएको छ ।
प्रतियोगितामा १६ वटा टिमको सहभागिता रहेको थियो । प्रतियोगिताको उपाधि विजेता र उपविजेता टिमले शिल्ड, मेडल तथा प्रमाणपत्र प्राप्त गरेका छन् । नेपाली चलचित्र अगस्तेका हिरो नासिर हुसेनको प्रमुख आतिथ्यमा पुरस्कार वितरण भएको हो । छैठौं संस्करणको प्रतियोगिता अर्को वर्ष भक्तपुरमा हुनेछ ।
