हेटौँडाः हेटौँडा–५ स्थित सिद्धार्थ शिशु सदनको ४४औं अभिभावक दिवस शुक्रबार सम्पन्न भएको छ । विद्यालय व्यवस्थापन समितिका अध्यक्ष नवराज अर्यालको अध्यक्षता तथा हेटौँडा उपमहानगरपालिकाकी प्रमुख मीना कुमारी लामाको प्रमुख आतिथ्यमा अभिभावक दिवस समारोह भएको हो । कार्यक्रममा विद्यार्थीले नृत्य, गायन, नाट्य, वाद्यवादन, उद्घोषण कलाका साथै खेल कौशल प्रस्तुत गरेका थिए ।
अभिभावक दिवसको अवसरमा २०७९ सालको एसईईमा उत्कृष्ट नतीजा हासिल गर्ने विद्यार्थी, विद्यार्थीको विषयगत उत्कृष्ट नतीजा हासिल गर्न सहयोग गर्ने शिक्षकलाई सम्मान गरिएको थियो । कार्यक्रममा कक्षागत अभिभावक सम्मान समेत गरिएको थियो । अभिभावक दिवसमा विद्यार्थीले विज्ञान, सामाजिक, गणित विषयको प्रदर्शनी गर्नुका साथै खानाका स्टल पनि विद्यार्थीले नै सञ्चालन गरेका थिए ।
कार्यक्रममा वडा अध्यक्ष सुशील घिमिरे, वडा सदस्य रञ्जिता सिलवाल, निजी तथा आवासीय विद्यालय अर्गनाइजेशन नेपाल (प्याव्सन) को केन्द्रीय समिति सहकोषाध्यक्ष ग्रेस श्रेष्ठ, मकवानपुर जिल्ला अध्यक्ष विनोद सुवेदी, हेटौँडा उपमहानगर समितिका अध्यक्ष रामकुमार श्रेष्ठको पनि आतिथ्य रहेको थियो ।
