हेटौँडाः लागुऔषधसहित २ जनालाई मकवानपुर प्रहरीले पक्राउ गरेको छ । मकवानपुर प्रहरीले बिहिबार बिहान हेटौँडा–१५, रातोमाटेबाट १० किलो २०० ग्राम लागूऔषध गाँजासहित सर्लाही जिल्लाको बागमती नगरपालिका–१२ का १९ वर्षीय निशान गोलेलाई प्रहरीले पक्राउ गरेको हो । बिहिबार बिहान साढे ७ बजेको समयमा हेटौँडाबाट बिराटनगरतर्फ जाँदै गरेको बागमती प्रदेश ०३–००१ ख ०४५३ नम्बरको यात्रुवाहक बसलाई रोकी सुरक्षाजाँच गर्ने क्रममा बसमा सवार गोलेले बोकेको झोलामा १० किलो २०० ग्राम गाँजा बरामद भएको प्रहरीले जनाएको छ । गोलेलाई हिरासतमै राखी अनुसन्धान गर्न मकवानपुर जिल्ला अदालतले जिल्ला प्रहरी कार्यालयलाई ८ दिनको म्याद दिएको छ ।
यस्तै बुधबार बिहान साढे ९ बजेको समयमा हेटौँडा–१५ रातोमाटेबाटै मकवानपुर जिल्लाको राक्सिराङ गाउँपालिका–२ का ४४ वर्षीय जगत बहादुर थोक्रालाई ५ केजी १०० ग्राम गाँजासहित पक्राउ गरेको छ । नारायणगढबाट बिराटनगरतर्फ जाँदै गरेको मे १ ख ३१७१ नम्बरको यात्रुवाहक बसलाई रोकी सुरक्षाजाँच गर्ने क्रममा बसमा सवार थोक्रालाई प्रहरीले गाँजासहित पक्राउ गरेको हो ।
