हेटौँडाः पूर्व–पश्चिम राजमार्गअन्तर्गत मनहरी–६, सुनादेवीमा ट्रकको ठक्करबाट मोटरसाइकल चालकको मृत्यु भएको छ । बिहिबार साँझ ७ बजेर ४० मिनेटको समयमा चितवनबाट हेटौँडातर्फ आउँदै गरेको ना ७ ख १७९६ नम्बरको ट्रकले विपरित दिशाबाट जाँदै गरेको बागमती प्र ०६ ००१ प ४५३७ नम्बरको मोटरसाइकललाई ठक्कर दिँदा दुर्घटना भएको थियो ।
दुर्घटनामा परी मोटरसाइकल चालक चितवन जिल्लाको माडी नगरपालिका–१२ का २० वर्षीय कोरेस चेपाङ गम्भीर घाइते भएका थिए । चेपाङलाई उपचारका लागि चितवनस्थित पुरानो मेडिकल कलेज लगिएकोमा बिहिबार राती ८ बजेर ४० मिनेटको समयमा डाक्टरले मृत घोषणा गरेको जिल्ला प्रहरी कार्यालय मकवानपुरले जनाएको छ । ट्रक चालक फरार रहेको र ट्रक चालकको खोजी कार्य भइरहेको प्रहरीले उल्लेख गरेको छ ।
