हेटौंडाः १४ औँ संस्करणको मकवानपुर जिल्लास्तरीय राष्ट्रपति रनिङ शिल्ड प्रतियोगिताअन्तर्गत् उसु प्रतियोगिता सम्पन्न भएको छ । शुक्रबार जिल्ला खेलकुद विकास समितिका अध्यक्ष वेश खड्गीको प्रमुख आतिथ्यमा प्रतियोगिता सम्पन्न भएको हो ।
प्रतियोगितामा पुरुषतर्फको सान्सोउ विधातर्फ रोवित थापा र महिलातर्फ संगम मोक्तान प्रथम भएका छन् । ४२ केजीदेखि ४५ केजी तौल समूहबाट पुरुषतर्फ बुद्ध भोलन र महिलातर्फ मनिष विक प्रथम भएका छन् । ४५ देखि ४८ केजी तौल समूहबाट पुरुषतर्फ विशेष थापा र महिलातर्फ सुनिता लामा भएका छन् ।
यस्तै, थाउलो विधाको छानछवान विधामा महिलातर्फ सर्गन मोक्तान र पुरुषतर्फ शीतल थिङ प्रथम भएका छन् । नानछवान विधातर्फ सयम राजु दहाल र जेनिशा गुरुङ प्रथम भएका छन् । ताइचीमा अविस्मा पाठक र रिषभ खतिवडा प्रथम भएका छन् ।
उसु प्रतियोगितामा २५ जना खेलाडीहरुको सहभागिता रहेको थियो । प्रतियोगितामा महिला र पुरुषतर्फ ४२ केजीदेखि ४८ केजी तौल समूहका खेलाडीहरुको सहभागिता रहेको थियो । प्रतियोगिताअन्तर्गत् शनिबार भलिबल, एथ्लेटिक्स, तेक्वान्दोलगायतको खेलहरु हुनेछ ।
प्रतियोगितामा सहभागी भएका खेलाडीहरुमध्ये प्रथम हुने खेलाडीलाई जिल्ला खेलकुद विकास समितिको नेतृत्वमा १५ दिन बन्द प्रशिक्षणमा सहभागी गराएर प्रदेशस्तरीय प्रतियोगितामा सहभागी गराइनेछ ।
जिल्ला खेलकुद विकास समितिका अध्यक्ष खड्गीको प्रमुख आतिथ्यमा पुरस्कार वितरण भएको थियो । पुरस्कार वितरण कार्यक्रममा उसु संघका सचिव विश्वनाथ पाठक, जिल्ला खेलकुद विकास समितिका कार्यालय प्रमुख माधव कोइराला, उसु प्रशिक्षक विमल थापा मगर, सितोरियो कराँते संघका अध्यक्ष दीपकबहादुर तामाङलगायतको आतिथ्य रहेको थियो ।
