हेटौँडाः हेटौँडा उपमहानगरपालिका–६, पुतलीबजरमा बस दुर्घटना हुँदा १० जना घाइते भएका छन् । बुधबार बिहान ९ बजेको समयमा फुर्केचौरबाट हेटौँडाबजारतर्फ आउँदै गरेको ना ३ ख ५३०३ नम्बरको बस दुर्घटना भएको हो ।
बसले टेलर ट्रकलाई साईड दिने क्रममा पल्टिँदा दुर्घटना भएको हो । बसमा १५ जना सवार थिए । बसमा सवार रहेका १० जना सामान्य घाइते भएका छन् । घाइते हुनेमा हेटौँडा–१७, हटियाकी २५ वर्षीया पुष्पा डंगोल, २१ वर्षीया रुपा डंगोल, हेटौँडा–१८ की ४५ वर्षीया महिला, सोही स्थानका ७० वर्षीय पुरुष, हेटौँडा–१७ का ५१ वर्षीय शंकर राई, ५५ वर्षीया आशा राई, बीरगंज घर भई हाल हेटौँडा–१६ बस्ने २२ वर्षीया सिमा साह, मकवानपुरगढी–७ की ५६ वर्षीया माहिली माया थिङ, मकवानपुरगढी–१, धाप बस्ने ४६ वर्षीय कुमार सिं गोले, हेटौँडा–१८, हर्नामाडी बस्ने ३६ वर्षीय सोमलाल थिङ रहेका छन् । घाइतेहरुको हेटौंडा अस्पताल र सन्चो हस्पिटलमा उपचार भइरहेको जिल्ला प्रहरी कार्यालय मकवानपुरले जनाएको छ ।
