हेटौंडाः हेटौंडा अस्पतालले हेटौंडा–४, कर्रास्थित श्रमिक माविमा सञ्चालन गरेको आइसोलेसन कक्षमा आज शनिबार ६ जना रहेका छन् । मकवानपुरको कैलाश गाउँपालिकाका ३ जना, हेटौंडा उपमहानगरपालिकाका २ जना रहेको आइसोलेसन वार्डका इन्चार्ज भोला चौलागाईले जानकरी दिनुभयो । त्यस्तै हेटौंडा–९ का १ जना कोरोना संक्रमित सुरुदेखि नै छन् । उनीहरुमध्ये १ जना केहीबेरमा डिस्चार्ज हुने र आजै ४ जनाको रिपोर्ट आएमा ४ जनापनि बेलुकसम्म डिस्चार्ज हुने उहाँले बताउनुभयो ।
पछिल्लो समयमा मकवानपुरको दैनिक ६/७ जनाको कोरोना परीक्षण हुने गरेको उहाँले बताउनुभयो । अहिले मकवानपुरका नागरिकहरुलाई प्राथमिकतामा राखेर कोरोना परिक्षण हुने हुँदा रिपोर्ट आउन ढिलाई नहुने गरेको उहाँले जानकारी दिनुभयो । काठमाडौंमा चाप बढेपछि १ हजार स्वाबको नमुना र तराई जिल्लाहरुबाट १ सय ५० भन्दा बढी स्वाब हेटौंडाको प्रयोगशालामा आइपुगे पनि मकवानपुरका नागरिकको रिपोर्ट आउन ढिलाई नभएको उहाँले बतउनुभयो ।
यस्तै आइसोलेसनमा भिटिएमको अभाव केहि दिनलाई टरेको छ । आइसोलेसनलाई स्वास्थ्य कार्यालय मकवानपुरले ४० थान, हेटौंडा उपमहानगरले १० थान, थाहा नगरले १५ थान, बकैया गाउँपालिकाले २५ थान भिटिएम उपलब्ध गराएकोले स्वाब संकलन गर्न समस्या नरहेको इन्चार्ज चौलागाईले बताउनुभयो । यता मकवानपुरको मनहरी गाउँपालिकाले भने मनहरी र राक्सिराङ दुवै क्षेत्रलाई कभर गरेको छ । मनहरीबाटै दुवै गाउँपालिकाको नागरिकहरुको स्वाब संकलन हुने गरेको छ । अन्य गाउँपालिकाको कर्रास्थित आइसोलेसनबाट स्वाब संकलन हुने गरेको इन्चार्ज चौलागाईले बताउनुभयो ।
हेटौंडाको क्वारेन्टाइनमा १४६ जना आए
हेटौंडाः हेटौंडा उपमहानगरपालिकाले संचालन गरेको हेटौंडा–१०, गोरक्षेश्वरको क्वारेन्टाइनामा आजसम्म १ सय ४६ जनाले सेवा लिएका छन् । विभिन्न जिल्लाबाट आएका व्यक्तिहरुलाई क्वारेन्टाइनमा राखिने र सम्बन्धित गाउँपालिकासँग समन्वय गरेर पठाइने गरेको क्वारेन्टाइनका इन्चार्ज टिएन ढुंगेलले जानकारी दिनुभयो । हालसम्म हेटौंडा उपमहानगरपालिका ९ महिलासहित ७२ जना क्वारेन्टाइनमा विभिन्न स्थानबाट आइपुगेको उहाँले जानकारी दिनुभयो ।
हेटौंडा उपमहानगरपालिकाको वडा नम्बर ९, १०, १२, १३ र १५ मा क्वारेन्टाइन संचालनमा छन् । हेटौंडाका ७२ जना नागरिकहरुलाई सम्बन्धित क्वारेन्टाइन तथा होम क्वारेन्टाइनमा रहेको उहाँले जानकरी दिनुभयो । हिजो शुक्रबार गोरक्षेश्वरको क्वारेन्टाइनमा महेन्द्रनगर हुँदै भारतबाट आएका ३ जना तेह्थुमका, धरानका १ र कैलाश गाउँपाकिलाका ३ जनालाई सम्बन्धित स्थानीय तहको एम्बुलेन्समा पठाइएको इन्चार्ज ढुंगेलले बताउनुभयो । यता विदेशबाट आएका हेटौंडा उपमहानगरपालिकाका नागरिकहरुको भने सबैको पिसिआर परीक्षण गर्न जोड गरिएको उहाँले बताउनुभयो ।
