हेटौंडाः मकवानपुर जिल्ला क्रिकेट संघले आयोजना गरेको प्रधानमन्त्री कप क्रिकेट टिम छनोट प्रतियोगिताको उपाधि मकवानपुर क्रिकेट क्लबले जितेको छ । बिहीबार हेटौंडा–४, हुप्रचौरमा भएको फाइनल खेलमा मकवानपुर क्रिकेट क्लबले ओमनगर क्रिकेट क्लबलाई ३९ रनले पराजित गर्दै उपाधि जितेको हो ।
टस जितेर पहिले ब्याटिङ गरेको मकवानपुर क्रिकेट क्लबले निर्धारित ४० ओभरमा ९ विकेट गुमाएर २ सय २३ रन बनाएको थियो । मकवानपुरबाट टिम कप्तान सुमन सुनारले सर्वाधिक ७४ रन बनाएका थिए । रिजन ढकालले ५२ रन, इरफान अलीले ४३ रन, समीर चौलागाईंले १३ रन, रामनरेश गिरी र तक्षक सिम्खडाले समान ९–९ रन बनाएका थिए । ओमनगरका रोहित ठाकुर, पियुस शर्मा, असिम श्रेष्ठ र गौरव खड्काले समान २–२ विकेट लिएका थिए । यस्तै, शुभ कंसाकारले १ विकेट लिए ।
जवाफी ब्याटिङमा उत्रिएको ओमनगरले ३२ ओभर २ बलमा सबै विकेटको क्षतिमा १ सय ८४ रनमात्र जोड्न सफल भएको थियो । ओमनगरबाट गौरव खड्काले सर्वाधिक ८७ रन बनाएका थिए । यस्तै, शुभ कंसाकारले ४२ रन, गोकुल अधिकारीले १८ रन, असिम श्रेष्ठले १० रन र रोेहित ठाकुरले १८ रन जोड्न सफल भएका थिए ।
मकवानपुरका समीर चौलागाईंले सर्वाधिक ३ विकेट लिएका थिए । तक्षक सिम्खडा, रामनरेश गिरी र शिभक कुसवाहले समान २–२ विकेट लिएका थिए । सन्तोष उपाध्यायले १ विकेट लिए ।
खेलको म्यान अफ द म्याच मकवानपुर क्रिकेट क्लबका रिजन ढकाल घोषित भएका छन् । प्रतियोगिताको उपाधि विजेता र उपविजेता टिमले शिल्ड, मेडल तथा प्रमाणपत्र प्राप्त गरेका छन् । प्रतियोगितामा सहभागी भएका टिमहरुमध्ये उत्कृष्ट १८ जनाको टिम छनोट गरी दोस्रो चरणको छनोट प्रतियोगिता सहभागी गराउन प्रदेश पठाउने जनाइएको छ ।
बुधबार हुप्रचौरमा भएको खेलमा मकवानपुर क्रिकेट क्लब ६ विकेटले विजयी भएको थियो । पहिले ब्याटिङ गरेको रेड स्वाइलले ३३ ओभर ५ बलमा सबै विकेट गुमाएर १४५ रन जोड्दा मकवानपुर क्रिकेट क्लबले १६ ओभर २ बलमा ३ विकेट गुमाएर लक्ष्य भेटाएको थियो । यस्तै, मंगलबार भएको खेलमा मकवानपुर बहुमुखी क्याम्पसलाई २४२ रनले पराजित गर्दै ओमनगर क्रिकेट क्लब विजयी भएको थियो । पहिले ब्याटिङ गरेको ओमनगरले निर्धारित ३५ ओभरमा ९ विकेट गुमाएर ३०२ रन बनाउँदा मकवानपुर क्याम्पसले १९ ओभर ४ बलमा १० विकेटको क्षतिमा ६० रनमात्र जोड्न सफल भएको थियो ।
