हेटौंडाः चितवन र सिन्धुलीमा २ जनाको मृत्यु भएको बागमती प्रदेश प्रहरी कार्यालय हेटौंडाले जानकारी दिएको छ । चितवन जिल्लाको कालिका नगरपालिका–४ मा रुखबाट लडेर एकजनाको मृत्यु भएको छ ।
मृत्यु हुनेमा कालिका नगरपालिका–४, सुनौलोटोलका ६० वर्षीय गिरबहादुर क्षेत्री रहेको बागमती प्रदेश प्रहरी कार्यालय हेटौंडाले जानकारी दिएको छ । क्षेत्री सोमबार बिहान ११ बजेर १५ मिनेटको समयमा पदमपुर सामुदायिक वनमा घाँस काट्न गएकोमा घर फर्की नआएकोले खोजी गर्दै जाँदा मंगलबार बिहान १० बजेर १५ मिनेटको समयमा रुखबाट लडी मृत अवस्थामा फेला परेको प्रहरीले जनाएको छ ।
यस्तै, सिन्धुली जिल्लाको कमलामाई नगरपालिका–१३ मा एकजना वृद्धको मृत्यु भएको छ । मृत्यु हुनेमा उदयपुर जिल्लाको कटारी नगरपालिका–७ का ७३ वर्षीय ईश्वर माझी रहेको प्रहरीले जनाएको छ । वृद्ध माथिल्लो रानीबास बस्ने दल बहादुर माझीको घरमा एक हप्ता अगाडिदेखि आई बसेका थिए । वृद्ध उठ्न बस्न नसक्ने भएको हुँदा घरमा समेत जानकारी गराएकोमा मंगलबार घर नजिकैको गोठमा मृत्यु भएको प्रहरीले जनाएको छ । मुचुल्का पश्चात शव पोष्टमार्टमका लागि जिल्ला अस्पताल लगिएको छ ।
