हेटौंडाः पूर्व–पश्चिम राजमार्गअन्तर्गत हेटौंडा–१५ रातामाटे चेकपोष्टबाट मकवानपुर प्रहरीले ४२ तोला सुनसहित २ जना पक्राउ गरेको छ । पक्राउ पर्नेमा भारत अमृतसार पंजाबका ३४ वर्षीय तर्सिम सिंह र धनुषा जिल्लाको सबेला नगरपालिका वडा–२ का ३९ वर्षीय हितेश कुमार शाह रहेको जिल्ला प्रहरी कार्यालय मकवानपुरले जानकारी दिएको छ ।
प्रहरीले शुक्रबार बिहान ३ बजे देखी ५ बजे सम्मको समयमा काठमाण्डौबाट बीरगंज तर्फ जाँदै गरेको ना ५ ख ६२१७ नम्बरको र बागमती प्रदेश ०३–००१ख १७२७ नम्बरको यात्रु बाहक बसमा छुट्टा छुट्टै सवार गरी आएका तर्सिम र हितेशको साथबाट अवैध सुन फेला पारेको थियो । प्रहरीले दुवै जनाको साथबाट ४ सय ८० ग्राम ०.८३ मिलिग्राम बराबर ४९ लाख २२ हजार ६ सय २५ रुपैयाँको अबैध सुन फेला पारेको थियो । सुनसहित तर्सिम र हितेशलाई नियन्त्रणमा लिई थप अनुसन्धानको लागी राजश्व अनुसन्धान कार्यालय पथलैया बारा पठाईएको मकवानपुर प्रहरीले जानकारी दिएको छ ।
