हेटौँडाः मकवानपुर जिल्ला फुटबल संघले आयोजना गरेको जिल्ला लिग छनोट प्रतियोगितामा रेफ्रीमाथि कुटपिट गर्ने दि रिभाइबल युथ क्लबका खेलाडीलाई कारवाही गर्ने निर्णय गरेको छ । संघका अध्यक्ष टीकाराम लामाले मंगलबार एक सूचना प्रकाशन गर्नुहुँदै दि रिभाइबल युथ क्लबलाई कारबाही गर्ने निर्णय गर्नुभएको हो ।
सोमबार पञ्चशील युवा क्लब र दि रिभाईबल क्लब बीचको खेल सकिएपछि दि रिभाइबल क्लबका खेलाडी, अफिसियलले रेफ्री माथि हातपात, गरेकोले क्लब, खेलाडी र अफिसियलहरुलाई कारबाही गर्ने निर्णय गरेको सूचनामा उल्लेख गरिएको छ । दि रिभाईबल क्लबलाई ३ वर्ष, क्लबका गोलरक्षक तथा क्याप्टेन अनिल लोलाई २ वर्ष, क्लबका खेलाडी सुनिल खड्कीलाई ३ वर्ष र क्लबका टिम म्यानेजर कृष्ण बहादुर ठकुरीलाई ३ वर्ष एन्फाले आयोजना गरेको फुटबल प्रतियोगितामा र एन्फा रेफ्री आवद्व प्रतियोगितामा सहभागी जनाउन प्रतिबन्ध गरिने बताइएको छ ।
यस्तै मकवानपुर जिल्ला फुटबल संघले दि रिभाइबल युथ क्लबका समर्थक ओम गुरुङ (कृष्ण) लाई पनि एक वर्ष प्रतिवन्ध लगाउने निर्णय गरेको छ ।
