हेटौंडाः लागुऔषध गाँजासहित मकवानपुर प्रहरीले २ जनालाई पक्राउ गरेको छ । सोमबार पूर्वपश्चिम राजमार्गअन्तर्गत हेटौँडा–१५, रातोमाटेस्थित प्रहरी चेकपोष्टबाट प्रहरीले २६ किलो लागुऔषध गाँजासहित २ जनालाई पक्राउ गरेको बागमती प्रदेश प्रहरी कार्यालय हेटौंडाले जानकारी दिएको छ ।
हेटौँडाबाट बीरगन्जतर्फ जाँदै गरेको बा १४ प ३७०८ नम्बरको कारलाई रोक्न खोज्दा नरोकी भागेपछि प्रहरी टोलीले चुरियामाई मन्दिर नजिक पुगी कारलाई नियन्त्रणमा लिएको थियो । कारलाई नियन्त्रणमा लिई सुरक्षाजाँच गर्ने क्रममा गाँजा बरामद भएको प्रहरीले जनाएको छ । प्रहरीले कार चालक चितवन जिल्ला भरतपुर नगरपालिका–२७ का ४२ वर्षीय रोशन दमाई र कारमा सवार खैरहनी नगरपालिका–१६ का ५२ वर्षीय डियन महतो पक्राउ गरेको छ । प्रहरीले लागुऔषध गाँजा दुवैजनालाई नियन्त्रणमा लिई आवश्यक कार्बाहीका लागि ईलाका प्रहरी कार्यालय अमलेखगन्ज बारामा बुझाइएको प्रदेश प्रहरी कार्यालय हेटौँडाले जनाएको छ ।
