हेटौंडाः इन्द्रसरोवर गाउँपालिका–४, फाखेलमा वडा कार्यालयको नवनिर्मित भवन उद्घाटन गरिएको छ । प्रतिनिधिसभा सदस्य महेशकुमार बर्तौलाले सोमबार भवनको उद्घाटन गर्नुभएको हो ।
गाउँपालिका र जिल्ला समन्वय समिति मकवानपुरको संयुक्त लगानीमा वडा कार्यालय भवन निर्माण भएको ४ नम्बर वडा अध्यक्ष चन्द्रकुमार बलले जानकारी दिनुभयो । ७० लाख रुपैयाँको लागतमा चार कोठे भवन निर्माण भएको हो । यसअघि पुरानो भवनबाट सेवा प्रवाह हुँदै आएकोमा पुरानो भवन भएको जग्गा व्यक्तिको पाइएपछि नयाँ भवन निर्माण गरिएको उहाँले बताउनुभयो । स्थानीय समाजसेवीद्वय जगतबहादुर डिम्डुङ र हरिकुमार लामाले क्रमशः ६ आना ३ पैसा १२ आना जग्गा वडा कार्यालयलाई भवन बनाउन दिनुभएको थियो ।
ठेकेदारले समयमा काम गर्न नसक्दा ठेक्का लागेको ३ वर्षपछि मात्रै भवन निर्माण कार्य सम्पन्न भएको हो । ४ नम्बर वडा अध्यक्ष बलको अध्यक्षतामा भएको भवन उद्घाटन कार्यक्रममा गाउँपालिकाका अध्यक्ष देवकृष्ण पुडासैनी, उपाध्यक्ष उमा लामा, पालिकाका निवर्तमान अध्यक्ष जीवन लामा, प्रमुख प्रशासकीय अधिकृत प्रल्हाद कार्की, वडा नम्बर ३ का वडा अध्यक्ष प्रताप भोम्जनलगायतको उपस्थिति रहेको थियो ।
