हेटौँडाः हेटौँडा उपमहानगरपालिकाकी प्रमुख मीना कुमारी लामाले नगर प्रमुखको पदभार ग्रहण गरेको दिन गर्नुभएको निर्णय १८ महिनापछि कार्यान्वयन हुन सुरु भएको छ । २०७९ साल बैशाख ३० गते सम्पन्न स्थानीय तहको निर्वाचनमा हेटौँडा उपमहानगरपालिकाको प्रमुखमा निर्वाचित हुनु भई २०७९ साल जेठ ९ गते पदस्थापित हुँदै गर्दा ५ वटा निर्णयमा हस्ताक्षर गर्नुभएको थियो ।
नगरप्रमुख लामाले चौथो बुँदामा बाटो विस्तारको क्रममा बाटोको बीच भागमा छोडिएका/रहेका विद्युतका पोलहरु हटाई छेउ किरानामा स्थापना गर्ने निर्णय गर्नुभएको थियो । विजुलीका खम्बा सार्नेसम्बन्धी नगरप्रमुखको निर्णय कार्यान्वयन गर्न कठिन हुने भन्दै आलोचना समेत भएको थियो । निर्णय भएको १८ महिनापछि नेपाल विद्युत प्राधिकरण हेटौँडा वितरण केन्द्रसँगले ठेकेदारमार्फत विजुलीका खम्बा सार्ने कामको सुरुवात गरेको हो ।
नेपाल विद्युत प्राधिकरण हेटौँडा वितरण केन्द्रले ठेकेदार कम्पनिसँग गत असार २१ गते २ वटा प्याकेजमा ठेक्का सम्झौता गरेको थियो । हेटौँडा उपमहानगरपालिकाको ७० प्रतिशत लागत र नेपाल विद्युत प्राधिकरणको ३० प्रतिशत लागत सहभागितामा ठेक्कामार्फत कार्यान्वयन गर्न लागिएको निर्णयअनुसारको काम ठेकेदार कम्पनिले सोमबारबाट सुरु गरेको छ । मंगलबार हेटौँडा–४, पशुपति मन्दिर नजिकका केही खम्बाहरु सार्न सुरु गरिएको छ ।
हेटौँडा उपमहानगरपालिका वडा नम्बर २ र ५ मा विजुलीका ७२ वटा खम्बा सार्नका लागि ४० लाख ६ हजार रुपैयाँमा ठेक्का सम्झौता भएको छ भने हेटौँडा उपमहानगरपालिका वडा नम्बर १, ४, ८, ९ र ११ मा विजुलीका ८१ वटा खम्बा सार्नका लागि ६६ लाख ९९ हजार रुपैयाँमा ठेक्का सम्झौता भएको छ । नेपाल विद्युत प्राधिकरण हेटौँडा वितरण केन्द्रका ईन्जिनियर सन्तोष चौहानका अनुसार स्थानीयको अवरोध नभए छिट्टै काम सकिनेछ । प्राधिकरणले विजुलीका खम्बा सार्ने क्रममा इन्टरनेट, टेलिफोन र केवल टेलिभिजनका तारहरु काटिदिँदा दूरसञ्चार र टेलिभिजन सेवा भने प्रभावित हुने गरेको छ । अव्यवस्थित तार भएका कारण नकाटी नहुने अवस्था रहेको काममा खटिएका प्राविधिकको भनाइ छ ।
