हेटौंडाः मकवानपुरगढी गाउँपालिकाको कार्यपालिका बैठकले अस्पतालको जग्गा स्वामित्वमा ल्याउने निर्णय गरेको छ । शुक्रबार बसेको कार्यपालिका बैठकले मकवानपुरगढी गाउँपालिका–६, डुम्रेकुनामा रहेको अस्पतालको जग्गा पालिकाको स्वामित्वमा ल्याउने निर्णय गरेको प्रवक्ता दिपेश दाहालले जानकारी दिनुभयो ।
यस्तै, बैठकले बालबालिका शाखाका साबित्री सापकोटालाई बालकल्याण अधिकारीको जिम्मेवारी दिने निर्णय गरेको छ । मकवानपुरगढी गाउँपालिकाले नगर प्रहरी सञ्चालन कार्यविधि २०८० स्वीकृत गरेको छ । पालिकाले एक असईको कमाण्डमा २ महिला २ पुरुष रहने गरी नगर प्रहरी राख्ने भएको छ ।
पालिकाले योजना तथा सिफारिस सफ्टवेयर खरिद गर्ने निर्णय गरेको छ । पालिकाले योजना सम्झौता, अभिमुखीकरण तालिम, विभिन्न कार्यक्रमहरु वडा नम्बर १, ७ र ८ मा मंसिर १३, १४ र १५ गते वडा कार्यालयमा नै गएर योजना सम्झौता गर्ने भएको छ । कार्यपालिका बैठकले वातावरणीय प्रभावको अध्ययन (इआईए) गर्ने स्वीकृति गरेको छ ।
पालिकाले ५ नम्बर वडामा रहेको इश्वरी प्राविको पुरानो भवनमा माटो र गोबर परीक्षण केन्द्र बनाउने निर्णय गरेको छ । प्रदेश सशर्त अनुदानको गाई प्रवद्र्धन कार्यक्रमअनुरुप किसानलाई ५० प्रतिशत अनुदानमा गाई प्रदान गर्ने निर्णय गरेको छ । पालिकाले समयानुकूल महिनाको एक पटक बैठक बस्दै आएको प्रवक्ता दाहाल बताउनुहुन्छ ।
