हेटौंडाः बागमती प्रदेशमा चाडपर्वको समयमा बढि भाडा लिने ५८ सवारी साधनबाट यात्रुहरुको भाडा फिर्ता भएको छ । चाडपर्वको समयमा बढि भाडा लिने ५८ सवारी साधनबाट ४ सय ४० जना यात्रीको भाडा प्रहरीले १ लाख १३ हजार ६ सय ७० रुपैयाँ रकम फिर्ता गराएको प्रदेश प्रहरी कार्यालय हेटौंडाले जानकारी दिएको छ । बागमती प्रदेश प्रहरी कार्यालयले काठमाडौं उपत्यकाका ३ जिल्लाबाहेक प्रदेशका १० जिल्लाको शान्ति, सुरक्षाको जिम्मेवारी पाएको छ ।
नेपालीहरूको प्रमुख पर्व दसैं, तिहार, छठ पर्वको अवसरमा सर्वसाधारण नागरिकमा सुरक्षाको अनुभूति गराई आर्थिक, सामाजिक एवम् संगठित अपराधका घटनाहरुलाई नियन्त्रण र निरुत्साहित गर्न प्रहरीले चाडपर्व लक्षित सुरक्षा योजना बनाएको थियो । प्रहरीले चाडपर्व लक्षित सुरक्षा योजना अनुसार बागमती प्रदेश मातहत जिल्लाहरूमा ५९ वटा यात्रु सहायता कक्ष स्थापना गरी सेवा प्रदान गरेको थियो । चाडपर्वमा मकवानपुर, नुवाकोट, काभ्रे र सिन्धुलीमा खटिएको प्रहरीको चेकिङ टोलीले भन्सार छलिआएका अवैध रूपमा ओसार पसार गरेको समानहरुमा १२ हजार ९ सय ६५ किलो चिनी, ९ लाख ४६ हजार ४ सय २० रुपैयाँ बराबरको कपडा (कुर्ता, सुरुवाल, साडी) बरामद गरी आवश्यक कारवाहीका लागि सम्बन्धित कार्यालयमा पठाइएको प्रदेश प्रहरी कार्यालयले जनाएको छ ।
यस्तै, प्रहरीले प्रदेशको मुख्य ३ वटा चेकपोष्ट मकवानपुर, चितवन र सिन्धुलीबाट ४५२ प्याकेट, ४४ पोका र ५ बोरा पटाका, आतिसबाजी जस्ता पदार्थ बरामद गरेको छ । प्रहरीले प्रदेशभरमा ३०९ वटा अपराधको कसूर दर्ता भएकोमा १ सय ९९ जना मानिस पक्राउ समेत गरेको छ । प्रहरीले चितवन, मकवानपुर, काभ्रे, नुवाकोट, सिन्धुलीबाट जुवा कसूरमा १०८ जनालाई पक्राउ गरेको छ भने जुवाको खालबाट १ करोड ६८ लाख ९५ हजार २९१ रुपैयाँ रकम बरामद गरी कानून बमोजिम अनुसन्धान कारवाही गरिरहेको जनाएको छ । चाडपर्वको समयमा १ सय ५६ वटा सवारी दुर्घटनामा परेकोमा २३ जना मानिसको मृत्यु भएको छ भने ३ सय ५१ जना मानिस घाइते भएका छन् । प्रहरीले चाडपर्वको समयमा कानुन उल्लंघन गर्ने जस्ता विभिन्न कसुरमा ५९ हजार ७३२ वटा सवारी साधनलाई कारबाही गरी ४ करोड ८८ लाख ५९ हजार ५ सय रुपैयाँ जरिवाना गरेको जनाएको छ ।
