हेटौँडाः हेटौँडा–८ स्थित कमाने क्रिकेट क्लबको आयोजनामा दोस्रो संस्करणको टि–१० कमाने प्रिमियर लिग क्रिकेट प्रतियोगिताको सेमिफाइनल समीकरण पूरा भएको छ । शनिबार लिग चरणको ६ वटा खेलहरु सम्पन्न भएसँगै सेमिफाइनल समीकरण पूरा भएको हो । शनिबार लिग चरणको खेलहरु सम्पन्न भएसँगै समूह ए बाट विजेता बन्दै कमाने राइडर्स र उपविजेता बन्दै कमाने टाइगर सेमीफाइनलमा प्रवेश गरेको छ भने समूह बी बाट विजेता बन्दै साविक विजेता कमाने हन्टर्स र उपविजेता बन्दै कमाने लायन्स सेमिफाइनलमा प्रवेश गरेको छ ।
भोलि आइतबार बिहान सेमीफाइनल खेल र दिउँसो फाइनल खेल हुने कमाने क्रिकेट क्लबका अध्यक्ष किशोर खत्रीले जानकारी दिनुभएको छ । पहिलो सेमीफाइन खेल कमाने राइडर्स र कमाने लायन्स बीच हुनेछ भने दोस्रो सेमीफाइनल खेल कमाने हन्टर्स र कमाने टाइगर बीच हुनेछ । आइतबारै सेमीफाइनल र फाइनल खेलको बीचमा वडा खेलकुद विकास समितिका पदाधिकारी र कमाने प्रिमियर लिगमा सहभागी क्लबका मालिकहरुको टिमबीच मैत्रीपूर्ण खेल हुनेछ ।
हेटौँडा–८, कमानेस्थित चन्द्रोदय माविको खेल मैदानमा शुक्रबार कमाने क्रिकेट क्लबका अध्यक्ष किशोर खत्रीको सभाध्यक्षतमा प्रतियोगिताको उद्घाटन कार्यक्रम भएको थियो । वडा अध्यक्ष रामकृष्ण थापाले प्रतियोगिताको उद्घाटन गर्नुभएको हो । उद्घाटन कार्यक्रममा बागमती प्रदेश क्रिकेट संघका सदस्य सन्जोग पोखरेल, वडा खेलकुद विकास समितिका अध्यक्ष उमेश थापा मगर र चन्द्रोदय माविका संचालक समितिका अध्यक्ष ईवाकर मैनाली लगायतको उपस्थिति रहेको थियो ।
प्रतियोगितामा करिब २ लाख रुपैयाँ खर्च हुने अनुमान गरिएको छ । प्रतियोगिताको लागि प्रथम पुरस्कारहाल कोरियामा रहनुभएका सुरज थापा मगरले र द्वितीय पुरस्कारको व्यवस्था हङकङ बस्ने कृष्णप्रसाद पौडेलले प्रायोजन गर्नुभएको कमाने क्रिकेट क्लबका अध्यक्ष किशोर खत्रीले जानकारी दिनुभएको छ । प्रतियोगितामा ८ टिमको सहभागिता रहेको छ । प्रतियोगिताको उपाधि विजेता टिमले २५ हजार रुपैयाँ र उपविजेता टिमले १५ हजार रुपैयाँ सहित शिल्ड, मेडल तथा प्रमाणपत्र प्राप्त गर्नेछन् ।
