हेटौंडाः हेटौंडा उपमहानगरपालिका ५ नम्बर वडास्तरीय दोस्रो व्याटमिन्टन प्रतियोगिता भोलि शुक्रबारबाट हुने भएको छ । प्रतियोगिताको तयारी पूरा भएको संयोजक नरेन्द्र मोक्तानले जानकारी दिनुभएको छ ।
वडा कार्यालयको आर्थिक सहयोगमा हुने प्रतियोगिता पिप्लेस्थित बालज्योति माविको कभर्ड हलमा हुनेछ । प्रतियोगितामा १६ जोडीले प्रतिस्पर्धा गर्ने संयोजक मोक्तानले बताउनुभयो । आइतबारसम्म सञ्चालन हुने प्रतियोगिताको विजेताले नगद १५ हजार रुपैयाँसहित शिल्ड, मेडल तथा प्रमाणपत्र प्राप्त गर्नेछ भने उपविजेताले नगद १० हजार रुपैयाँ प्राप्त गर्नेछ । यस्तै सेमिफाइनलमा पराजित हुने दुई टिमले २ हजार ५ सय रुपैयाँका दरले पाउनेछ ।
