हेटौँडाः हेटौँडा–१७ मा हटिया खेलकुद विकास समितिको आयोजनामा यही कार्तिक २० गतेदेखि प्रथम वडा अध्यक्ष कप नकआउट फुटबल प्रतियोगिता हुने भएको छ । शनिबार हटिया खेलकुद विकास समितिले एक सूचना जारी गर्दै यहि कार्तिक २० गतेदेखि हुन लागेको प्रतियोगिता बारे जानकारी गराएको हो ।
प्रतियोगितामा १७ नम्बर वडाका स्थायीवासी खेलाडीले मात्र सहभागिता जनाउन पाउने उल्लेख गरिएको छ । आफ्ना गाउँ–घरका खेलाडीको खेलप्रतिको लगाव, लगनशीलता र प्राथमिकता जगाउने तथा खेलप्रेमी दर्शकहरुको मनोरञ्जन गराउने लक्ष्यले प्रतियोगिताको आयोजना गर्न लागेको बताइएको छ । प्रतियोगिताको उपाधि विजेता टिमले ४० हजार रुपैयाँ र उपविजेता टिमले २५ हजार रुपैयाँसहित शिल्ड, मेडल र प्रमाणपत्र प्राप्त गर्नेछन् भने प्रत्येक खेलको म्यान अफ द म्याच र विधागत उत्कृष्ट खेलाडीहरुका लागि समेत पुरस्कारको व्यवस्था गरिएको छ ।
