हेटौंडाः कक्षा ११, १२ का विद्यार्थीहरुको प्रथम त्रैमासिक परीक्षा सुरु भएको छ । हेटौंडा–२ स्थित मकवानपुर बहुमुखी क्याम्पसमा बिहीबारदेखि परीक्षा सुरु भएको हो । साउन ७ गतेदेखि कक्षा ११ र १२ को पढाइ सुरु भएको थियो । यो परीक्षा क्याम्पसले आफैँ आन्तरिकरुपमा लिने परीक्षा हो ।
हेटौंडा उपमहानगरपालिकाको भूटनदेवी माध्यमिक विद्यालयमा पनि कक्षा ११ र १२ को प्रथम त्रैमासिक परीक्षा सञ्चालन भइरहेको छ । विद्यालयमा सिभिल इन्जिनियरिङ, विज्ञान र वाणिज्य विषयमा अध्ययन गर्ने कक्षा ११ र १२ का विद्यार्थीको त्रैमासिक परीक्षा गरिएको हो ।
सिभिल इन्जिनियरिङको गत आइतबारबाट प्रथम त्रैमासिक परीक्षा सुरु भएको हो भने वाणिज्य तथा विज्ञान विषय अध्ययन गर्ने विद्यार्थीको परीक्षा बुधबारबाट सुरु भएको हो । आगामी असोज २४ गते कक्षा ११ र १२ का सबै विषयको परीक्षा सकिने बताइएको छ ।
हेटौंडा उपमहानगरपालिकाका अन्य विद्यालय तथा क्याम्पसले पनि दशैं विदाअघि कक्षा ११ र १२ को प्रथम त्रैमासिक परीक्षा सञ्चालन गर्ने तयारी गरिरहेका छन् ।
