हेटौंडाः लागूऔषध नाईट्राभेटसहित एक युवकलाई प्रहरीले नियन्त्रणमा लिएको छ । चितवन जिल्लाको राप्ती नगरपालिका–१५, कोराकका २३ वर्षीय विकास मोक्तानलाई प्रहरीले लागूऔषधसहित पक्राउ गरेको जनाएको छ ।
प्रहरीचौकी बसामाडीबाट गस्तिमा खटिएको प्रहरी टोलीले बिहिबार हेटौंडा उपमहानगरपालिका–१९, तीनताप्केबाट पक्राउ गरेको हो । झोला बोकी शंकास्पदरुपमा हिँडिरहेका बखत् शंका लागि सुरक्षाजाँच गर्दा मोक्तानको झोलाबाट एक हजार ५० ट्याब्लेट लागुऔषध नाइट्राभेट बरामद भएको प्रहरीले जनाएको छ । मोक्तानलाई प्रहरी हिरासतमा राखी थप अनुसन्धान गरिरहेको जिल्ला प्रहरी कार्यालय मकवानपुरले जानकारी दिएको छ ।
