हेटौँडाः नेकपा एमालेका उपाध्यक्ष एवम् संविधानसभाका सभामुख सुवासचन्द्र नेम्बाङप्रति श्रद्धाञ्जली व्यक्त गरिएको छ । मंगलबार बिहान नेकपा एमालेको पार्टी कार्यालयमा नेकपा एमाले मकवानपुरका नेता, कार्यकर्ताले नेम्बाङको तस्वीरमा माल्यार्पण तथा पुष्पगुच्छा अर्पण गरी श्रद्धाञ्जली व्यक्त गरेका हुन् ।
मंगलबार बिहान हृदयघात भई ७१ वर्षको उमेरमा नेम्बाङको निधन भएको हो । नेम्बाङप्रति श्रद्धाञ्जली व्यक्त गर्न नेकपा एमाले मकवानपुरले मंगलबार बिहान ११ बजे हेटौँडा–५ स्थित पार्टी कार्यालयमा शोकसभा गरेको थियो । नेम्बाङको पार्थिव शरीरको अन्त्येष्टि बिहिबार गरिने भएको छ ।
सरकारले नेम्बाङको राजकीय सम्मानसहित अन्त्येष्टि गरिने दिन शोक व्यक्त गर्दै सार्वजनिक बिदा दिने निर्णय गरेको छ । नेम्बाङको बिहिबार काठमाडौंमा अन्त्येष्टि गरिने बताइएको छ । नेम्बाङको निधनप्रति देशविदेशमा रहेका नेपालीले दुख व्यक्त गरेका छन् । नेम्बाङको निधनप्रति विभिन्न मुलुकका प्रमुखले पनि दुख व्यक्त गरेका छन् ।
