हेटौँडाः मकवानपुर प्रहरीले भन्सार छलेर ल्याएको अवैध कपडासहित एकजनालाई पक्राउ गरेको छ । पक्राउ पर्नेमा बारा जिल्लाको बारागढी गाउँपालिका–४ का २८ वर्षीय सञ्जय चौधरी रहेको बागमती प्रदेश प्रहरी कार्यालय हेटौँडाले जनाएको छ ।
मंगलबार प्रहरीले वीरगञ्जबाट हेटौँडातर्फ आउँदै गरेको प्र २–०३–००१ च ६२०४ नम्बरको कुरियरको पिकअप गाडीलाई रोकी सुरक्षाजाँच गर्दा गाडीबाट भन्सार छलेर ल्याएको ६ लाख बराबरको कपडा फेला पारी बरामद गरेको थियो । गाडीबाट कुर्था सुरुवाल ४ हजार ३ सय ७७ थान, सादा सल ८ थान, सुरुवाल ४ थान, जुत्ता ५२ जोर, झोला ६ थान, बच्चाको सेन्डो ६ सय थान र साडि १५ थान बरामद गरेको प्रहरीले जनाएको छ । अवैध कपडासहित चौधरीलाई प्रहरी वरिष्ठ हवल्दार अमिरिका महतो नेतृत्वको ३ सदस्यीय टोलीले भन्सार कार्यालय बीरगन्ज पुर्याएको प्रहरीले जनाएको छ ।
