हेटौँडाः सोह्रौं पुस्तकालय दिवसको अवसरमा आयोजना गरेको भिडियो सन्देश प्रतियोगितामा अनुसुया खनाल, निमिषा निरौला, मुना दाहाल, यश लामा, विशाल दोङको भिडियो उत्कृष्ट ५ मा पर्न सफल भएको छ । हेटौँडा–४, भैरवरोडस्थित किताब घरले आयोजना गरेको भिडियो सन्देश प्रतियोगितामा २० जनाको सहभागिता रहेको किताबघरका सञ्चालक छवि अनित्यले जानकारी दिनुभएको छ ।
किताबघरले बिहिबारसम्म भिडियो सन्देश पठाउन आव्हान गरेको थियो । उत्कृष्ट भिडियो सन्देश निर्माताहरूलाई शुक्रबार पुस्तकालय दिवसको अवसरमा किताबघरमा एक कार्यक्रमका बीच पुरस्कृत गरिएको छ । पाँचैवटा उत्कृष्ट भिडियो सन्देशहरू किताबघरको फेसबुक पेजमार्फत सार्वजनिक गरिएको छ । पठन संस्कृति विकासका लागि किताबघरले यसप्रकारका विभिन्न कार्यक्रमहरूलाई आगामी दिनहरूमा समेत निरन्तरता दिनेछ । पाँचवटै उत्कृष्ट भिडियो निर्मातालाई जनही एक हजार रुपैयाँ बराबरको पुस्तक प्रदान गरिएको छ ।
